Haree ba situasaun ne’e Kompañia Gardamor obriga-an fó servisu ba sidadaun sira, maske laiha ona garantia ba sustentabilidade, maibé governu kontribui hasa’e númeru dezempregu, tanba hapara kontratu ho kompaña refere.
Maske nune’e, Kompaña Gardamor la iha intensaun atu hapara funsionáriu hamutuk ema rihun-2-resin husi servisu fatin, maibé situasaun mak obriga hapara ema sira ne’e husi serbisu.
Diretór ezekutivu kompañia Gardamor, Eduardo Belo Soares "Gattot" hatete, totál rekursu oras ne'e dadaun ne'e sira iha ema hamutuk rihun-1-resin.
Tanba iha tinan 2017, funsionáriu hamutuk ema besik rihun-tolu resin, maibé tanba situasaun impase polítika iha TL, ikus mai halo kompaña tenke hapara funsionáriu kuaze rihun 2 resin.
“Gardamor lakon ema besik 2000 durante 2018 mai to'o pandemia agora ne'e, lakon ema kauze besik 2000 pesoál. Hahú husi situasaun impase ne’e, gardamor hahú lakon ona to'o agora”, deklara Eduardo ba jornalísta www.tempotimor.com iha nia kna'ar-fatin Fatuhada, sesta (19/03).
Maibé, razaun hapara funsionáriu hirak ne'e, tanba setor privado ho Governu hakotu kontratu ho kompaña Gardamor, nune'e obriga kompaña deside hapara funsionáriu balu husi servisu.
“Sira ne'e destaka iha ministériu sira iha Dili laran, governu kuaze oituan liu, maibé iha setór privadu sira mak barak. Maibé barak liu, lakon quer dizer empreza la estável”, hatete nia.
Kompaña mós lakon funsionáriu tanba nia bele lakon servisu husi empreza ida nee, mais empreza seluk bele akomoda fali.
Iha promesa governu nia ne’ebé dehan atu kria empregu ba ema hamutuk rihun 60 kada tinan, maibé la realiza tanba realidade Gardamor rasik lakon nia funsionáriu sira husi postu servisu ne'ebé molok destaka.
Tanba problema kampu serbisu ne’e la’os problema kompaña nian maibé problema nasaun nian ne’eb duni governu labele tula todan ba kompaña iha situasaun inserteza.
“Governu hapara kontratu ba kompaña Gardamor iha los situasaun ida difisil hanesan ne’e nia laran mak pesoál seguransa sira ne’ebe antes ne’e destakadu iha MNEK sei susar liu atu serbisu nafatin iha Gardamor hodi monta fali iha postu foun seluk”, dehan Gatot.
Tanba ne’e, kompaña sente triste tanba númeru dezempregu sei aumenta ba beibeik husi loron ba loron iha nasaun ne’e.
Maibé, rekomenda ba governu atu konsistente iha nia promesa sira labele koalia de'it, hafoin ikus mai fó prezuiju fali ba seitór privadu sira.
“Ami sente todan, tanba ne'e mak sé bele iha tempu pandemia ne'e governu bele haree halo didi'ak”, hakotu nia. (*)