Ministru Reforma Lejislativa asuntu Parlamentar Fidelis Leite Magalhães konsidera notisia ne'ebé tempotimor publika la tuir realidade ne'ebé iha.
“Aproveita oportunidade ida ne'e atu informa tanba informasaun ne’ebé trend iha estilu halo relatóriu ka reportajen iha ajensia notisioza iha ne'e. Relatoriu ka kontéudu la hanesan ho nia títulu. Ha'u-nia respeitu ba liberdade imprensa no espresaun, maibé fiar katak iha falta grave de étika jornalistika ne'ebé lori ita-nia populasaun ba objetivu ne'ebé la hatene saida, maibé laos objetivu jornalizmu méritu kualidade nian”, dehan Ministru Fidelis bainhira deputadu António da Conceição husu loos ba ministru kona-ba notísia ne'ebé tempotimor publika, iha plenária Parlamentu Nasionál, Tersa (04/06/2019).
Ministru dehan, nia parte mós simu informasaun husi konsoladu ne'ebé aprezenta informasaun ida kontrariu husi notisia ne'e.
"Mais ida ne’e mós faz parte ida trend iha tempu ne'e, ne'ebé popular iha nasaun ne'e liu husi relatóriu ka reportajen ne'ebé ho kultura tendensiozu boot tebes," katak nia.
Nia dehan Primeiru Ministru no governu iha informasaun hodi hatene ninia membru governu nia serbisu hotu.
Relasiona ho kestaun ne'e, Diretór tempotimor, José Antonio Belo hatete, mekanizmu kobertura no publikasaun ne'ebé tempotimor halo priense kodigu etika jornalista nian.
"Ami iha fontes ne'ebé fo informasaun no ami koko rekolla provas no halo konfirmasaun ba Vise Ministra, maibé Vise Ministra la fó resposta. Vise Ministra iha direitu atu la fó resposta no ami mós iha knar atu publika. Mas antes publika ami konfirma duni ho parte Ministeiru Saude no Ministru Saude Interinu hato’o tiha ninia pozisaun maka notisia refere ami publika," dehan José Belo.
José Belo dehan, bainhira nia parte simu informasaun, Entretantu, tempotimor koko haruka pergunta liu husi WhatsApp ba Vise Ministra Saúde kona-ba reuniaun iha Jenebra no tanba sa mak nia fila uluk, maibé maske iha sinal neebé hatudu Vise MS nee lee ona mensajen refere, maibé nia la fó resposta. Nune’e duni tempotimor.com publika notisia refere hafoin de halo konfirmasaun uluk ho Ministru Saúde Interino Bonifacio Maucoli dos Reis.
“Ha’u delega nia ba partisipa iha reuniaun OMS iha Jenebra. Maibé nia halai tiha de’it husik diretór ida ho asesor mak partisipa, tanba reuniaun ohin mak finaliza. Nia mai pasiar tiha iha Denpasar (Bali),” dehan Ministru bainhira hetan konfirmasaun husi tempotimor.
Hafoin, iha 2 Juñu MS halo publikasaun iha pajina Facebook Ministériu Saude nian hodi deklara katak Vise MS tuir enkontru ASM to'o remata.
Iha loron 03 Juñu, 15:54 Tempotimor.com hakat ba gabinete vise Ministra da saude hodi halo pedidu intervista eskluxivu ida. Iha 04 Juñu, Tempotimor koko konfirma ho parte midia iha gabinete vise Ministra da saude ninian maibe informa via sms dehan seida'uk iha resposta nafatin.