"Ha’u hanoin atividade rekoperasaun ekonomia ne'e labele ida sesta bázika. Sesta bázika la’ós dezenvolvementu sustentável. Dezenvolvementu ida sustentável mak dezenvolvementu ida ne'ebé garante ema tenki-ser iha produsaun ne'ebé kontinua, la’ós ohin de’it mak nia iha maibé aban-bainrua, tinan-oin e depois asesu ba merkadu”, dehan António iha PN, tersa (23/03).

Programa sesta bazika di’ak hanesan parte atendementu provizóriu atu povu labele falta ai-han, ajudu umanitária ba populasaun iha tempu badak, maibé kona-bá rekoperasaun ekonomia governu kria fali atividade iha setór produtivu nian.

Setór produtivu mak hanesan movimentu kooperativa nian, ne'ebé mak babain joven sira halibur malu hodi halo atividade kooperativa iha setór agrikultura.

Alende ne'e, atividade kreditu ba setór privadu, agrikultor sira hodi asesu ba kapitál ruma atu halo dezenvolvementu ba sira-nia atividade.

"Ne'e mak kontribui ba atividade rekooperasaun ekonomia tanba ita bele dehan ema produz rasik ona hodi bele sustenta ona ita-nia merkadu”, dehan António.

Haree ba situasaun pandemia covid-19 ne'ebé limita ema nia viajen ba estranjeiru sai momentu oportunidade ba governu atu halo hanesan konsentra ba setór agrikultura, infraestrutura bazika hodi garante asesu populasaun.

Antes ne'e, Deputadu Bankada Kmanek Haburas Unidade Nasional Timor Oan (KHUNTO),
Antonio Verdial, konsidera implementasaun programa sesta bázika ne’ebé governu halo iha tinan 2020 no 2021 seidauk bele rekoopera ekonomia rai laran.

"Ami mós iha observasaun durante ne'e katak, programa rekuperasaun ekonomia liuhusi dalan sesta bázika, ita la dun ajuda rekuperasaun ekonomia iha rai laran. Tanba programa hahán ka sasán hirak ne’ebé povu simu husi sesta bázika ne'e, maioria produz husi rai liur”, dehan nia plenária PN, segunda (22/03).(*)