Traballadór sira ne’e fila mai Timor-Leste no to’o iha Aeroporto Internasionál Nicolao Lobato Díli, iha loron kuarta (24/03), tuku 11:28 otl, ho aviaun Qantas.
“Ita-nia traballadór na’in-7 mak fila mai Timor tanba sira-nia kontratu mak remata e balun tanba problema família entaun sira aproveita okaziaun ida-ne'e hodi husu lisensa ba sira-nia empregadór hodi fila mai Timor," dehan Adidu Traballadór ba Austrália Sekretária Estadu Formasaun Profesionál no Empregu (SEFOPE), Thomas de Araújo Guterres, iha Aeroportu Internasionál Prezidente Nicolao Lobato Komoro Dili, kuarta (24/03).
Traballadór sira ne’e mane de’it hamutuk na’in-7 ne'ebé mak arangka ba Austrália nu'udar SWP iha tinan 2019.
Maibé, SEFOPE nia dever mak hato’o lia-fuan benvindo ba traballador sira, hato'o esplika medidia prevensaun Covid-19 iha Timor-Leste enkuantu kona-ba sistema kuarentina responsáblidade husi Ministériu Saúde.
Husi observasaun www.tempotimor.com nota, Qantas Air VH-XZG to’o iha Aeroportu Komoro tuku 11:28 Otl ho pasajeiru hamutuk na’in-20, ne'ebé ekipa husi Ministériu Saúde (MS) dereitamente rega desinfetante ba sasán sira husi pasajeiru, trata dokumentu iha imigrasaun antes evakua ba fatin kuarentina durante loron 14 tuir regra protokolu MS no Organizasaun Mundial Saúde (OMS). (*)