Aviaun Citilink ne’ebé tula pasajeiru sira husi Kuala Kumpur Malaizia semo kuaze tuku 07:00 oras no to'o iha Aeroporto Internasionál Prezidente Nikolao Lobato Komoro Dili, Timor-Leste (TL), iha tuku 13:00otl.

Diretór Agensia Citilink iha Timor-Leste, Fernando da Silva hatete, husi pasajeiru 162 ne'e, kompostu husi timoroan na'in-154, no sidadaun estranjeiru husi Portugál ho Korea Súl na'in-8.

“Kuaze Timoroan, estranjeiru na'in-8, husi Portugál ho na'in-4 husi Korea Súl sira ne'e servisu hotu iha ne'e, entaun totál ohin mai 162, husi kuala-lumpur mai Dili”, dehan nia iha Aeroporto Komoro, tersa (30/03).

Ema hirak ne'e, mai husi nasaun Inglatera, Kuba, Israel, Korea Súl, Vietnam no Portugál, kompostu husi traballadór, no estudante sira, inklui mate isin ida.

Hafoin pasajeiru hirak ne'e tun iha Aeroporto, servisu saúde halo kedas dezinfekta ba sira, no hein ekipa konjunta evakua kedan ba kuarentina ótel Fortuna, otel Colmera, Funan Buras, otel Timor, otel Luxuri, otel Luz Clarita, INAP, otel Audian, otel Fantija, no Salaun Madre Salesiana Komoro.

Antes ne’e, Autoridade Nasionál Aviaun Sivíl Timor-Leste, (AACTL) aprova ona pedidu voo charter ho aviaun Citilink husi Ajénsia Viajen, ho destinasaun Kuala Lumpur-Dili, ne’ebé sei to’o iha Aeroportu Internasionál Prezidente Nicolau Lobato, Komoro, tersa (30/03) no aviaun ne’e sei filafali iha loron hanesan.

Ministru Transporte no Komuniaksaun, José Agostinho da Silva, hateten pedidu voo ne’e tama iha ninia gabinete iha sesta (26/03) ho diskrisaun sei transporta no repatria timoroan sira no viajen ne’e sei kumpre protokolu saúde ne’ebé estabelese ona.

Voo ne’e koordean ona ho liña ministeriál hanesan MNEK, Ministériu Interiór (MI), Ministériu Saúde, inklui Sala Situasaun Sentru Inetgradu Jestaun Krize (CIGC). (*)