Tuir planu traballadór na'in 51 mak atu aranka ba servisu iha nasaun Korea Súl, iha loron tersa 30 fulan-marsu tinan 2021, maibé ekipa saúde sira halo teste SWAB, na'in 3 deteta pozitivu Covid-19.

Nune'e, traballadór na'in-48 mak dadaun fiksu ona ba Korea, ho pasageiru sira seluk hamutuk na'in 170 maka aranka ona ba estranjeiru.

Diretór Agensia Citilink iha Timor-Leste, Fernando da Silva hatete, pasajeiru ne’ebé sai husi Dili ba kuala-Lumpur (Malaizia) hamutuk na’in-170.

"Ohin husi Dili ba fali Kuala-Lumpur ne'e hamutuk na'in 170, maioria ita-nia maluk timoroan sira ne'ebé mak fila atu ba servisu iha sira-nia servisu fatin uluk hanesan Inglaterra ho Korea Súl, restu mak balun estudante”, dehan nia iha Aeroporto Internasionál Komoro, tersa (30/03).

Na'in 3 ne'e, wainhira halo teste iha Hospitál Nasionál Guido Valadares (HNGV), iha loron segunda (29/03) dader kedas ema ida-idak simu ona ninia rezultadu.

"Ida-idak simu ona ninia rezultadu, na'in hira mak pozitivu ne'e ida-idak hatene ona, entaun nia labele mai tán fali iha ne'e, mais ohin dadersan dehan, ema ida mai iha ne'e, nia pozitivu mai iha ne'e, mas ita-nia autóridade seguransa sira simu ona informasaun, entaun haruka nia ba kotuk, depois ambulánsia mai foti nia”, nia informa.

Iha parte dader traballadór sira prepara iha Aeroportu Internasionál Prezidente Nicolao Lobato Komoro, maibé maize menus iha tuku 10:17otl, ekipa konjunta prevensaun ba mitigasaun surtu Covid-19 evakua fila traballadór ida ba izolamentu, tanba komfirmadu pozitivu Covid-19.

Tuir observasaun www.tempotimor.com iha terenu nota, pasajeiru na'in-170 ne’ebé sa'e ona aviaun Citilink, hodi ba Malaizia iha tuku14:54otl. (*)