Deputada Maria Angelica Rangel deklara, medida serka sanitária ne'ebe dadaun ne'e aplika ba Munisípiu Dili, Baukau no Vikeke, fó implikasaun maka’as ba ekonomia iha rai laran, tanba laiha ema atu importa ai-han mai fa'an iha Munisípiu Dili.

“Husu ba governu atu hare didi’ak l, serka sanitária, ne'ebe mak dadaun ne'e iha distritu tolu, hanesan Dili, Vikeke no Baukau, ami ko’alia nune'e, tanba serka sanitária ne'e halo implikasaun boot ba kestaun ekonomiku, rai laran nian, laiha sirkulasaun ema lori aihan atu mai fa'an iha Díli, ema barak lakon servisu, no ema barak para servisu, tanba ne'e ami dehan governu tenke hanoin didi’ak, hodi estende serka sanitária”, afirma nia liuhusi debate pedidu estesaun estadu emerjénsia ba dala sanuluk-resin-rua iha plenária estraordinariu PN, kuarta (31/03).

Prevensaun Covid-19 normalmente, governu hanoin katak halo serka sanitária, maibé regra ne'e di’ak liu prátika iha suku ne’ebé mak afetadu de'it maibé labele ba Kapitál tomak.

Husu mós Ministru Ensinu Superior Siensia no Kultura (MESSK) atu autoriza fó feriadu ba estudante universitáriu fulan tolu hanesan ne'e, atu governu bele haree, tanba iha aprezentasaun pior senariu sira durante ne’e haree katak ninia implikasaun boot.

Deputada bankada Fretilin ne'e kestiona ho deklarasaun Ministra Saúde (MS) ne’ebé hatete pior senariu refleta ba covid-19 mak aumenta maka’as, ema hirak ne'e bele izola iha lona okos.

Sente triste boot, tanba Parlamentu Nasional aprova pedidu levantamentu dala rua ba orsamentu ho montante millaun US$10 tau iha Kapitál dezemvolvimentu atu halo reabilitasaun ba kondisaun fatin sirs ne’ebé atu fasilita ba ema hirak ne’ebé hetan pozitivu ba covid-19.

Fatin hanesan deputada bankada CNRT, Vergina Ana Belo, husu ba governu atu buka mekanizmu oinsá mak bele rezolve kestaun medida serka sanitária ne’ebé fó impaktu ba ema barak nia ekonomia.

Governu tenke hanoin ona nia mekanizmu saida mak atu halo, hodi bele reduz tanba wainhira fó hela de'it subsidiu ba ema, karik serka sanitária estende to'o tinan ida, ne'e subsidiu hirak mak governu tenke fó nafatin.

“Ne’ebé buka mekanizmu buka meius seluk, hanoin membru governu sira iha ne'eba barak-barak tenke ajuda Primeiru Ministru, ba ida ne'e, se ita-boot sira la konsege no laiha kreativu duni atu halo ida ne'e, ita-boot sira mak laiha kapasidade duni”, dehan nia.

Tuir lolos, governu ida labele dehan laiha kapasidade depois troka de'it ema iha Ministériu hothotu, ikus mai halo situasaun ne'e rungu ranga liután.(*)