Husi dadus jerál Covid-19 iha Timor-Leste, dadaun kazus foun, 41, kazu rekuperadu 8, total kazu ativu 415. Husi total kazu foun mane 24, feto 17, iha sintomátiku 3 no asintomátiku 38.

"Ohin loron 31 fulan-marsu tinan 2021, hodi Centro Integrado Gestão de Crises, Sala Situação (CIGC-SS) nia naran, hakarak hato’o ba jornalista no ba públiku tomak, katak, ohin iha Munisípiu Dili iha kazu foun 41, nune’e, iha Munisípiu Dili, sei iha cluster 46 mak sei nafatin hatudu atividade hada’et-tutan virus SARS-CoV-2 husi ema ida ba ema seluk, liuliu iha Suku Bebobuk, Fatuhada ho Komoro", dehan Rui liuhusi Zoom Conferensia, kuarta (31/03).

Ho nune’e, kazu detetadu ka pozitivu iha Munisípiu Dili husi loron 7 to’o 31 fulan-marsu tinan 2021, hamutuk hotu 456.

“Husi horiseik mai ohin hamutuk hotu Laboratóriu Nasiona Saúde (LNS) halo 1008 testes PCR, inklui ona iha laran 480, ne’ebé mai husi pedidu autorizasaun esepsionál atu sai husi serka sanitária iha Munisípiu Dili”, dehan nia.

Totál pedidu autorizasaun esepsionál atu sai husi no tama mai serka sanitária iha Munisípiu Dili, loron 30 fulan-marsu, hamutuk hotu 84. Sekretariadu CIGC responde hotu kedas, maibé 21 pedidu la prienxe kritéria tuir Resolusaun Governu.

"Informa mós ba públiku katak, hahú ohin madrugada fatin izolamentu Vera Cruz simu tan kazu detetadu ida, sintomátiku, grave. Kazu ne’e, señora, ho idade 69 anos, iha diabete ho obesidade. Hahú isin-manas, i’is-bo’ot semana 1 ona. Oras ne’e dadaun halo hela ba infesaun seluk ne’ebé mós afeta ninia pulmaun no pasiénte uza hela '’high flow oxigen’’ dehan nia.(*)