“Iha tinan kotuk, Timor-Leste hetan rekoñesimentu husi komunidade internasionál hanesan país ualu ne’ebé hetan susesu-di’ak iha jestaun COVID-19 nian, hanesan ho Nova Zelándia no país sira seluk”, deklara Taur iha debate renovasaun estadu Emerjénsia ba dala 12 iha plenária Parlamentu Nasionál, kuarta (31/03).

Maibé, rezultadu di’ak sira-ne’e agora iha hela prova husi vaga moras foun ida-ne’e nian, ne’ebé agresiva no ezijente liu.

“Atu ita bele filafali ba ita-nia moris normál sein rejistu mate sira-nian, ha’u apela ba hothotu, sein exesaun, katak ita kumpri medida sira prevensaun nian ne’ebé hala’o hela, atu nune’e, kontribui, hodi evita propagasaun husi moras ida-ne’e iha ita-nia país”, dehan nia.

Taur dehan, Governu ne’e kontinua halo buat hotu ne’ebé mak nia bele halo, tantu iha nível nasionál no nível internasionál, ho Parseiru Bilaterál, Rejionál no Multilaterál sira, atubele asegura akompañamentu saúde timoroan hothotu nian.

“Iha asuntu ida-ne’e, ha’u hakarak apela ba Deputada atubele renova konfiansa no apoiu ne’ebé hatudu ba Governu iha fulan hirak ikus ne’e, hodi autoriza ba renovasaun estadu emerjénsia ba da-12 husi Deklarasaun Estadu Emerjénsia, nu’udar instrumentu fundamentál no insubstituível ne’ebé permite ba ita atu previne no kombate moras ida e ne’ebé iha poténsia boot ba mate”, dehan Taur.

Husu mós ba sidadaun sira iha territóriu laran tomak ne’ebé de’it, nunee mós autoridade no organizasaun sira sosiedade sivíl nian atu hamutuk lit kontra Covid-19.(*)