Haree ba situasaun ne'ebé akontese iha Dili kona-ba ezijénsia komunidade no estudante sira-nian, ne'ebé atu fila ba knua maibé governu la fó dalan, tanba serka sanitária no Konfinamentu obrigatóriu ba prevensaun no mitigasaun Surtu Covid-19, maibé komunidade nafatin obriga aan sai husi Dili liu dalan Ilegal.
“Ba VIII Governu Konstituisionál, ha'u propoin hodi loke koridór ba “exodo urbanu” ba ema sira ne’ebé hakarak fila ba sira nia knua; Disponbiliza transporte atu fasilita sira nia viajen no halo kontrole sanitáriu efetivu liu; Identifika sidadaun ida-idak ne’ebé sai no viatura ne’ebé uza”, dehan Sekjer Fretilin Marí iha ninia
pájina facebook, sábadu (03/04).
Maibe, sidadaun sira ne'ebé teste ona labele viajen hamutuk ho sira ne'ebé seidauk teste iha transporte ida nia laran.
"Sidadaun sira ne’ebé teste ona iha Dili labele hamutuk iha viatura ida de'it ho sira ne’ebé seidauk teste; Mobiliza partisipasaun husi família no autoridade komunitária sira, iha fatin ne’ebé sira atu ba, hodi fasilita kontrole sanitáriu no permite atu halo teste Swab ba sira hotu ne’ebé sai husi Dili sein teste no teste daruak depois de minimu loron 10 ba ema hotu ne’ebe sai husi Dili”, dehan Mari.
Klasifika deklarasaun ne'e urjente, tanba ne'e presiza halo desizaun extraordináriu, nune'e labele hamosu krize, tanba aktu sira ne'ebé akontese bobar lia husi ema ne'ebé sai opozisaun ba governu ne'ebé Fretilin viabiliza.
"”Urjente tebes atu hala'o ida ne’e hodi bele respeita vontade sidadaun sira-nian sein tau em kauza nesesidade husi sira ne’ebé luta hela kontra propagasaun Covid-19 no, nune’e ita bele dudu sira ne’ebé halo manipulasaun ho má fé no iresponsabilidade boot ba frustrasaun, dala ida tan”,
afirma Alkatiri.
Mari alerta, ba governu ne’ebé Fretilin viabiliza tau povu nu'udar sentru, tanba povu mak riku soin loloos nasaun nian.
"Imi nu'udar sentru ba atensaun, hakarak proteje imi husi pandemia no lori nasaun tomak ba dezenvolvimentu real no sustentavel. Maibé opositor sira ba governu ida ne’e buka atu uza de'it imi, halo imi hanesan instrumentu atu taka sira-nia sala. Tanba ne'e ha'u husu vizilánsia máxima”, hakotu nia.(*)
