"Sira oferta barak los, ami husu hotu sira kontaktu ba Sekretáriu Estadu Protesaun sivíl ho Ministériu Interior hodi sira bele fó dadus saida mak pais sira bele ajuda, mesajen husi Sekretáriu Jerál Nasaun Unidas (ONU), husi Ministériu Negósiu Estranjeiru barak, pois pais, embaixada lubuk ida iha ne'e sira prontu atu ajuda ita”, informa Adaljiza iha Sentru Saúde Formosa, kuarta (07/04).

Nasaun sira ne'ebé atu ajuda mak Austrália, Uniaun Europeia, Amerika, Organizasaun internasional hanesan ONU inklui embaixada sira ne'ebé halo misaun iha Timor-Leste.

Maibé, husu atu diplomata sira bele kontaktu dereitamente ba Ministeiru relevantes ne'ebé nia servisu iha relasaun ho dezastre naturais nune'e bele habadak birokrasia.

“Balun book-an dadaun, sira koordena dereitamente ho Ministériu Interior”, dehan Adaljiza.

Entertantu inundasaun ne'ebé akontese iha Timor-Leste hetan atensaun husi mundu, tanba halakon ema liu 30 nia moris, iha estragu barak ba infraestrutura hanesan estrada, ponte, uma no to'os ho natar.(*)