Vise Xefe bankada CNRT, Patrocino Fernades dos Reis hatete ekipa konjuntu presiza esplika ba públiku kona-ba ema ne’ebé pozitivu no iha hela izolamentu derepente live hodi halo atividade iha públiku.

“Buat sira ne'e, ha’u hanoin ejize esklaresimentu husi sentru intergradu jestaun krize ninian, ho mós Ministériu saúde mak tenke fó esklaresimentu ida ne'e ba públiku, e presiza informasaun, tanbasá mak ema ida pozitivu iha hela izolamentu e agora livre hela halo movimentu iha liur ne'e”, afirma deputadu ne’e iha PN, kinta (08/04).

Tanba ne’e, ejize respinsabilidade SIJK nomós Ministériu saúde hanesan mós Ministériu ne’ebé tutela ba asuntu saúde públiku, no hanesan mós Ministériu ne’ebé responsavel ba covid-19, tenke esplika ba públiku atu hatene.

“Moras ka virus ne'e ita hotu hatene, mais iha Timor ne'e, ejisti duni ema pozitivu ka lae, se la ejiste tenke esplika ba públiku tanba akontese ona hanesan ne'e, e komesa horseik to'o ohin ita seidauk rona membru governu ruma, ka husi Ministériu saúde no sentru intergradu jestau krizi nian atu hato'o informasaun ruma”, dehan nia.

Tanba, prezensa Naimori iha fatin públiku bele hamosu dúvida kona-ba ejistensia moras Covid-19 iha Timor-Leste.

"Sim klaru ha’u hanoin la presiza, ha’u fó resposta ba ida ne'e, tanba depois husi ninia movimentu bele ona provoka públika ninia duvida, ba covid-19 ne'e, tanba ha’u la'ós ema médiku, ha’u ema politiku, lalika de'it públiku dúvida, ha’u mòs dúvida”, hatete nia.

Bainhira ema ne’ebé sei pozitivu Covid-19 seidauk iha autorizasaun husi Ministériu Saúde no SIJK atubele halo movimentu iha públiku Polísia Nasional Timor-Leste (PNTL) tenke hola assun no lori ba izolamentu.

“Polísia labele haree ema balun ne’ebé nia sente katak labele karik pois husik de'it, ka oinsá, ne’ebé ha’u hanoin katak tenke aplika regra, lei ne'e, ba ema hothotu”, dehan nia. (*)