Print this page

PM Taur Husu Líder Sira Labele Aproveita Situasaun Hatun Malu

Prezidente Republika, Dr. Francisco Guterres "Lu Olo", simu enkontru iha nia rezidensia ofisial ho Primeiru Ministru Taur Matan Ruak no Vise PM nain rua, Kinta (8/4) Prezidente Republika, Dr. Francisco Guterres "Lu Olo", simu enkontru iha nia rezidensia ofisial ho Primeiru Ministru Taur Matan Ruak no Vise PM nain rua, Kinta (8/4) Foto Midia PR

Tempotimor (Dili) - Primeiru Ministru (PM), Taur Matan Ruak, husu ba líder sira atu atu labele aproveita situasaun difísil hodi hatun malu, maibé hamutuk hodi hasoru situasaun ne’ebé nasaun no povu enfrenta.

Tanba situasaun difísil presiza sidadaun hotu nia kontribuisaun atu manás problema ne’ebé Timor-Leste enfrenta hanesan dezastre naturál no surtu Covid-19.

"Iha momentu ne'ebé difisíl, ida ne'e mak hamutuk ita luta manán, ha'u husu ba sira para ita kontinua hamutuk, ita labele fahe malu labele aproveita fali situasaun hodi hatun ida, hasae ida, ita la manán, timoroan ida la manán, nein ha'u manán, Prezidente mós la manán, Avo Nana mós la manán, ami hotu la manán, ita hotu la manán”, deklara PM Taun hafoin reuniaun ho Prezidente Repúblika, Francisco Guterres Lú Olo iha ninia rezidénsia Farol, kinta (08/04).

Bainhira Timoroan hakarak manán situasaun difísil presiza hamutuk hodi luta hasoru kalamidade inundasaun no surtu Covid-19 iha Rai Laran.

Maske ema hothotu lakohi dezastre, maibé mosu ona presiza hasoru hanesan inimigu ida ne’ebé Prezidente Republika dehan Covid-19 ne’e inimigu invizível ne’ebé hamutuk hodi funu.

“Ita hamutuk para funu, tanba ita hakarak moris, hakarak ita-nia rain ba oin, hakarak ita-nia rain nia naran morin iha mundu tomak, hakarak ita-nia povu ema elujia katak, povu ida lutador. Sé lae ita-nia komportamentu la di'ak, ha'u hanoin ita hatun ita-nia an, hatun ita-nia nasaun, hamoe ita-nia rain”, dehan Taur.

Ho situasaun ne'e, dadaun governu kontinua halo esforsu maka’as, buka dalan hodi fó apoiu ba vítima inundasaun sira.

"Tanba ne'e, ba sira hotu ne'e afeitadu, sira ne'e la mesak, klaru governu la halo milagre, mais buat ne'ebé ami halo bele, ami sei halo fó apoiu sira”, afirma Taur. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items