Print this page

Vítima Inundasaun Rejeita Taur, Hakarak Prezensa Xanana

By April 09, 2021 10614
Mane ne'ebe hamriik iha feto no labarik sira nia klaran hodi hakilar rejeita prezensa PM Taur Matan Ruak iha Malo'a, Tersa (6/4) Mane ne'ebe hamriik iha feto no labarik sira nia klaran hodi hakilar rejeita prezensa PM Taur Matan Ruak iha Malo'a, Tersa (6/4)

Tempotimor (Díli) – Komunidade Malo’a ne’ebé sai vítima ba inundasaun iha loron domingu (04/04) rejeita Primeiru Ministru (PM), Taur Matan Ruak, bainhira tun direta hodi observa komunidade nia uma no ponte inklui estrada ne’ebé naksobu, maibé komunidade hakilar sira presiza mak prezensa líder Karismátiku Kay Rala Xanana Gusmão.

Maske prezensa Taur Matan Ruak iha komunidade nia let hodi hare estragu husi inundasaun no fó korajen no solidariedade ba povu ne’ebé afeta husi Dezastre Naturál ne’e, maibé komunidade balu deside lakohi simu no haruka fila.

Akontesimentu ne’e iha besik mota Malao, iha loron Tersa mais ou menus tuku 9:30 OTL, wainhira PM Taur akompaña husi Vise PM, Jose Reis no Ministru Obras Publika, Salvador Pires ba haree estrada ho uma komunidade ne’ebé estraga husi inundasaun.

Iha deklarasaun ne’ebé komunidade hasai hodi rejeita prezensa Taur Matan Ruak hamutuk ho membru Governu sira seluk iha Maloa maibe, iha mós komunidade balun ne’ebé simu hodi la’o hamutuk Xefe Governu ba vizita fatin afeitadu sira iha Maloa.

Maibé simu mal trata husi populasaun balun, Xefe Governu kontinua hala'o observa fatin dezastre naturál iha área Maloa, Suku Bairopite Postu-Administrativu Don Aleixo Munisípiu Dili to’o remata.

Maske, komúnidade balun hakilar lian maka’as hasoru Xefe Governu, maibé, Taur Matan Ruak kontinua halo observasaun, no dada lia ho komúnidade balun.

Iha vizita ne’e PM Taur hamrik hela iha estrada ne’ebe be sobu kotu ida nia rohan iha Malo’a, ema balun hakilar sira nia rejeisaun. Inan feto ida dehan, “ne’e só (hakilar) maka’as mak foin bele rona”.

Bainhira rona tiha instrusaun husi inan feto ne’e, mane ida ne’ebé hamrik iha sorin hakilar ho lian maka’as kedan “Ami presiza avó Nana mak mai,” ne’ebé simu ho hamnasa husi feto no labarik sira besik fatin ne’eba.

Ho asaun mane ida ne’ebé hamriik helik iha senora ida nia kotuk, iha moru laran, hakilar ho lian maka’as halo senora ne’e hodi nia liman taka tiha nia tilun parte karuk.

Hafoin ida ne’e, komunidade mane ida ho oin siak, kous hela nia oan, hamriik hamutuk ho feto no labarik sira, iha sorin seluk simu hakilar “Viva avó Nana.”

Komunidade balun simu ho hamnasa no seluk fali hakilar dehan, “haree fila, fila……”.

Maske nune’e, iha sorin seluk, hafoin rona mane na’in-rua ne’e hakilar rejeita Taur nia prezensa, feto ida dehan, “eeeehhhh keta halo Taur hanesan ne’e, Taur ne’e……..ne’ebe di’ak liu ses tiha tan ba Taur ba same ne’eba ne’e.”

Iha Loron hanesan, Primeiru Ministru ho nia ekipa mós halo ona observasaun ba estrada ne’ebé tohar iha Kampun-Alor embaixada Japaun nia oin, Mota Komoro, Manleu Bedoku, Malo’o, Bidau, Bekora, Hera, no remata iha ponte Taibessi. (*)

Rate this item
(3 votes)
Last modified on Friday, 09 April 2021 09:20
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com