Vise Xefe Bankada CNRT, Patrocinio Fernandes dos Reis hatete, asaun ne’ebé Xanana hatudu iha terenu hodi defende povu tanba lakoi grupu balun sama povu nia dignidade.
Ne'e duni hanesan deklarasaun Deputadu Aniceto Guterres ne’ebé dehan Xanana la hatudu atetude hanesan líder, bankada CNRT responde de'it katak nia (Aniceto) mak la hatudu ninia atetude hanesan lider.
"Ne’ebé ha’u hanoin ho asaun sira ne'e, ami respeita tebtebes, teknika sira nia servisu, politikamente ami apoiu 100% ba maun Xanana ninia asaun hodi defende povu Kbi’it sira-nia halerik, ha’u hanoin ida ne'e de'it mak ami bele responde ba deklarasaun deputadu Aniceto nian”, dehan nia iha PN, tersa (13/04).
Nia hatutan Vontade ne’ebé Xanana iha ne'e la'ós foin akontese maibé akontese ona komesa iha tempu luta defende povu husi inimigu sira.
Maibé, Deputadu bankada Fretilin, José Agostinho Sequeira ‘Somotxo’ husu governu atubele utiliza sira nia kompeténsia hodi asegura Maun Xanana Gusmão hodi lori sai mate isin ba haloot iha Semitériu covid-19 metinaru.
“Ne’ebé iha situasaun ida ne'e (Vera Cruz), ba asegura tiha maun Xanana, mate ne'e sai”, dehan nia.
Maske públiku tomak dehan governu la hadomi ninia povu, maibé tenke rekoñese realidade ida ne'e, tanba ema ne’ebé mate ba covid tenke obrigatóriu kumpre desizaun estadu.
Tanba, regra implementasaun Estadu Emerjénsia rasik mak fó kompeténsia ba governu, labele iha ema ida atu politiza fali estadu.(*)