Maske, pasiénte covid-19 barak mak hetan ona tratamentu husi governu liuhusi ekipa Ministériu saúde (MS), maibé governu rasik la sériu atu foti medida hodi bele proteje sidadaun sira husi covid-19.
“Irregularidade barak mak Governu rasik halo iha prosesu tratamentu pasiénte COVID-19, mak obriga Maun Boot Kay Rala Xanana foti asaun”, dehan nia iha Sede partidu CNRT Bairo dos Grilhos, kuarta (14/04).
Iha loron 12 fulan-abril, Xanana hatudu ninia asaun, tanba Xanana rasik la dun satisfas ho desizaun governu ne’ebé deklara Estadu Emerjénsia maibé la foti medida ho rigor iha parte sanitária nian nomós la sériu proteja sidadaun sira husi ameasa COVID-19.
Númeru pozitivu Covid-19 ne’ebé dehan mosu Suai, no haksoit ba Baukau ikus mai nakfera iha Dili. Tanba governu la plika dezinfetante ba ema no sasán ne’ebé tama no sai husi kapitál Dili no medida seluk durante implementasaun Estadu Emerjénsia.
"Pior liu Governu halibur hamutuk pasiénte pozitivu Covid-19 nian iha fatin kuarentina ho izolamentu maibé la aplika medida rigoroza hodi proteze pasiénte sira-nia saúde, hanesan la prepara ai-moruk ne’ebé adekuadu, la mantem distánsia sosiál
maibé iha kuarentina sira ne’e rame hela de’it hanesan iha merkadu”, dehan nia.
Pasiénte barak maka dadauk ba sulan hamutuk iha kuarentina ho izolamentu atu kumpre loron 14 tuir protokolu Covid-19 ne’ebé OMS fó sai.
Maibé tuir infornasaun ne’ebé iha, Governu la husik sira sai husi kuarentina ho izolamentu no la halo esplikasaun hodi fó razaun di’ak ba sira.
"Governu halo tratamentu espesiál, ate halo lei espesiál atu akomoda lider partidu balun nia ezijénsia, ne'ebé deklara la-fiar Covid-19 no lakohi atu ba hela iha izolamentu, tanba ne'e Governu halo lei hodi hasai pasiénte ne no muda fatin izolamentu ba iha uma privadu”, kestiona.
Tanba ne’e, Kay Rala Xanana triste tanba Governu halo presedimentu fúnebre (hakoi ka enterru) sidadaun ne'ebé mate ho Covid-19 la ho dignu no la tuir kultura Timor nian, no la tuir prosedimentu ne’ebé OMS hasai ona.
“Irregularidade sira ne'e mak obriga Maun Boot Kay Rala Xanana halo asaun, hafoin rona tiha halerik husi matebian Amindo Borges (47) nia fen-kaben ho oan sira iha dadersan madrugadaiha residénsia Maun Boot Xanana nian bainhira hakotu iis tanba moras crónico no kleur, maibé trata fali nu’udar pasiénte COVID-19 no obriga atu tuir prosedimentu ne’ebé Organizasaun Saude Mundial (OMS) rasik korrize no hasai tiha ona”, afirma.(*)