Material emerjénsia hirak ne'e transporta iha aviaun forsa defeza Australia nian ne'ebé to'o iha Aeroportu Internasionál Nicolau Lobato, Komoro Dili-TL, iha tuku 14:39 oras timor-leste.
Liuhusi karta komunikadu, Embaixadór Australia iha TL, Petter Robert haktuir, material asisténsia emerjénsia hamutuk tonelada 27 resin ne'e', inklui materiál preparasaun hahán, materiál tenda no mós ijéniku nian ne'ebé ohin kuarta (14/04) to'o ona iha Dili, ho Austrália nia aviaun Boeing Royal Australian Air Force C-17 Globemaster.
"Materiál hirak ne'e hola parte ba Austrália nia pakote asisténsia emerjénsia ho montante AUD millaun 7 ba Timor-Leste depoizde inundasaun iha tempu Páskua foin dadauk ne'e iha Timor-Leste. Ekipa Asisténsia Médiku Austrálianu nian ida (AUSMAT) mós halo viajen tuir aviaun ida ne'e", dehan embaixadór Petter Robert liuhusi karta kokunikadu neebé www.tempotimor.com asesu ohin, kuarta (14/04/2021).
Petter Robert dehan, alende apoiu umanitáriu hirak ne'e, maibé epidomiolojista senior no ofisiál asisténsia sira saúde nian sei serbisu hamutuk ho Ministériu Saúde nia ekipa vijilánsia ne'ebé mak daudaun ne'e jere responde ba COVID-19.
"Ekipamentu Protesaun Pesoál (PPE) sei aumenta ba governu nia stok ne'ebé mak hetan estragus depoizde inundasaun, ne'e hanesan kontinuasaun ba PPE kilograma 500 husi Austrália iha semana kotuk. Materiál asisténsia emerjénsia hirak ne'e aumenta ba Austrália nia apoia imidiatamentu ne'ebé fornese ona ema barak iha sentru evakuasaun sira", dehan nia.
Tanba ne'e, materiál asisténsia emerjénsia nian sira ne'e, sei distribui liuhusi Austrália nia Parseria Umanitária nia Organizasaun Non Governamental (ONG) sira iha TL.
"Austrália orgullu tebes hala'o serbisu hamutuk ho Governu Timor-Leste hodi apoia Timor-Leste nia esforsu hodi responde ba COVID-19 no rekuperasaun ba inundasaun", tenik iha komunikadu ne'e.
Entretantu, apoiu umanitáriu hirak ne'e to'o iha Aeroportu internasionál Nicolau Lobato, Komoro, simu direta husi Vise Ministru Saúde (MS), Bonifáçio "Maukoli" dos Reis, Sekretáriu jerál MNEK, Jorge Camões no akompaña husi Embaixadór Australia, Petter Robert iha Aeroportu Komoro.(*)
