Mate isin Armindo ne’ebé rai durante kalan haat ona iha Izolamentu Vera Cruz, iha loron kinta (15/04), Sentru Integradu Jestaun ba Krize (SIJK) entrega ba família no Prezidente Partidu CNRT, Kay Rala Xanana iha oras tuku 14:00 otl.
Maske entrega ona ba família hodi hakoi tuir kultura, maibé nafatin la’o tuir protokolu ne’ebé SIJK estabele ona.
Maibé, família no komunidade Sira ne’ebé partisipa nafatin la kumpri regra ne’ebé estabelese hanesan uza máskra no distansiamentu Sosial, tanba ema balun hamrik laiha distansia.
Iha serimonia funeral matebian Armindo partisipasaun husi família no komunidade inklui apoiante no simpatizante husi Prezidente Partidu CNRT rasik.
Antes matebian halot, amo ngelo Salsinha ne’ebé prezide orasaun hafoin bele halot tuir serimonia kultural, maibé nafatin regra husi organizsaun Saúde Mundial no SIJK.
Hafoin ida ne’e, kuaze oras tuku 17:00 otl mate isin matebian halot, no ekipa saúde desinfekta kedan hafoin taka rai kuak ho sumente, maske família balun la uza protesaun, maibé partisipa hodi halot mate isin.
Antes ne’e, Diretór Sentru Integradu Jestaun ba Krize (SIJK), João Miranda ‘Aluk’ hamutuk ho ekipa sira hasoru malu ho líder Partidu CNRT, Kay Rala Xanana iha Izolamentu Vera Crus hodi tuir desizaun estadu, maibé laiha solusaun.
Ho ida ne’e, Governu deside hodi rai mate isin iha konzelador, tanba mate isin Armindo loron rua ona maibé seidauk iha konkordansia atubele ba halot iha fatia ne’ebé governu deside ona ba Semitériu Covid-19 Metinaro.
Maske, família matebian hamutuk ho Líder Partidu CNRT kontinua ezije hodi lori mate isin ba halot tuir tradisaun, maibé seidauk iha desizaun kona-ba fatin atu halot mate isin.
Antes ne’e, iha kalan tolu Prezidente Partidu Congresso Nacional de Reconstrução Timorense (CNRT), Kay Rala Xana Gusmão hamutuk ho família matebian toba hela iha estrada sala Izolamentu Vera Cruz hodi ejize Governu entrega ba família.
Matebian Armindo Borges husi Munisípiu Ainaro, Postu Administrativu Ainaro, Suku Manu-tasi, Matebian ho idade 47 iha oan na'in-7, feto 3 mane 4.
Matebian ne’ebé antes ne’e sofre moras stroke hemoragic, no karreta ambulánsia foin transporta nia husi nia hela fatin iha Kampung Merdeka, Komoro, Dili atu ba konsulta moras ne’e iha Hospital Nasionál Guido Valadares (HNGV) iha Bidau, Toko Baru, Dili.
Maibé, médiku sira imediata foti pasiente ne’e ba halo swab ho rezultadu positivu Covid-19, nune’e, lori kedan ba Vera Cruz loron domingu (11/04).
Aliende matebian nia membru família na’in-tolu ne’ebé halo teste swab husi rezultadu hatudu na’in-rua detetadu pozitivu surtu Covid-19 no ida negativu.
Maske,membru família na’in rua afetadu ho COVID-19, mas deside lakolabora ho parte saúde hodi ba kumpri regra ne’ebé fó sai husi Organizasaun Saúde Mundial ba iha sala Izolamentu, maibé hamutuk ho líder partidu CNRT no komunidade balun iha izolamentu Vera Cruz hodi ejize mate isin Armindo. (*)
