Koordenadór Ekipa husi postu evakuasaun patrimoniu estadu Minguel Maia hatete, nia parte lamenta mekanizmu tékniku husi SEPS tanba seidauk levanta dadus ba vítima inundasaun iha aldeia 12 outumbru, maibé ekipa hahú fahe ona apoiu uminatáriu.

Tanba hanesan pesoál ida ba afetadu inundasaun, husi bairo João Paulo II, nia rona informasaun Sekretáriu Estadu Protesaun Sivíl ba asuntu dezastre naturál ne'e, hahú fahe hahán.

“Durante ne'e sira nunka mai haree, ekipa sira seluk mai, maibé ekipa ida ne'e seidauk mai haree, mais ha’u lahatene tanbasá mak ohin sira-nia ekipa lori sasán ne'e mai tau iha fatin jerál (umun) ne'e”, nia hato'o krítika ne'e iha ambitu distribuisaun apoiu umanitariu iha Tasitolu, sábadu (17/04).

Husu governu presiza identifika dadus tanba, ema barak la hetan afetadu ba inundasaun maibé evakua hotu ba postu evakuasaun patrimoniu estadu iha área Tasitolu.

"Kuandu ita atu serbi povu ne'e tenke ba husu lai, afeitadu ne'e hira no la afeitadu ne'e hira se ita hakarak hanesan ne'e lalika hein ema inundasaun mak imi lori mai fahe”, dehan nia.

Rekomenda mós ba SEPS atu simu mós ejizensia husi ekipa postu evakuasaun ne’ebé governu estabelese iha Tasitolu.

“Ha’u respeita tebes ita-nia governu ida ne'e, maibé ha’u kestiona de'it katak, ita la rona, ita hakarak mai fahe fali buat ida ofisial ba populasaun, ne'e ha’u la konpriende”, hatete nia.

Hatan ba kestaun ne'e, Diretór Jerál Ministériu Administrasaun Estatal (MAE), Oracio dos Santos husu ba vítima inundasaun sira hotu atu kalma no pasiénsia oituan.

Iha distribuisaun ne'e mak ladun par ho dadus, bele hato'o reklamasaun nune'e ekipa bele deteta lolos ema ne’ebé mak merese hetan apoiu.

"Ba dadus ne’ebé mak seidauk simu sasán ohin, bele reklama liuhusi autoridade komunitáriu sira atu ita hotu bele hetan dadus ne’ebé real no ema hothotu bele asesu ba kualker apoiu ruma ne'ebe mai”, hakotu nia.(*)