Konsidera estrada refere presíza halo rekonstrusaun urjensia, tanba ne’e hanesan estrada protokolu, mak deside hodi ajudika ba kompaña Montana Diak hahú servísu.
Tuir observasaun www.tempotimor.com iha terenu nota katak, servísu normáliza estrada refere, dadaun eskavator rua mak suru sai hela rai henek tasi nian iha estrada ne'ebé kotu atu normáliza permanente hikas.
Normáliza estrada ne'e, bazeia ba despaxu husi Primeiru Ministru (PM), Taur Matan Ruak, ho númeru 46/PM/IV/2021 hodi forma ekipa Task Force liuhusi Ministeriu Planu no Ordenamentu (MPO) ho Ministériu Obrás Públiku (MOP) halo identifikasaun no kuantifikasaun ba estragu sira.
Nune'e, Ministru Obrás Públika (MOP), Salvador Pires, orienta Diresaun Jerál Obrás Publikas (DJOP) liuhusi Diresaun Nasionál Estrada Ponte no Kontrolu Seias (DNEPCC) servisu hamutuk ho kompaña hahú halo rekonstrusaun permanente ba estrada monu iha embaixada Japaun oin, Kampung Alor, Dili, ne'ebé afeita husi inundasaun loron 04 fulan-abril 2021.
Kompaña Montana Diak iha fatin refere, dadaun hala'o ona servisu iha terenu, no hetan akompaña direita husi Diretór Nasionál DNEPCC, João Gama, no tékniku sira hodi orienta kompaña servísu tuir estudu no dezeñu ne'ebé iha. (*)