"Ha’u mós hakarak ko’alia maibé foku liuba saida mak agora akontese iha sentru izolamentu sira iha Dili ne'e, por favor ita-boot sira labele tau ema feto ho mane hela hamutuk iha fatin ida, ema ida joven ho joven bele akontese buat hothotu iha ne'eba”, dehan nia liuhusi debate renovasaun estadu emerjénsia (EE) ba dala-sanuluk-resin-tolu (13) iha plenária PN, kuarta (28/04).
Maske juventude feto ho mane mós infetadu covid-19, maibé governu tenke kria kondisaun ba sira no tau sira ketak, tanba orsamentu covid-19 ne’ebé parlamentu nasional aprova husi tinan 2020 to'o 2021 atu responde problema ne'e.
“Se hakarak ita lori ita-nia juventude sira sai aat, ida ne'e mak ita-boot sira sei halo. Orsamentu ba Covid-19 ne'e atu halo saida, kria espasu ba izolamentu, ha’u hakarak ko’alia kona-ba fatin izolamentu sira ne’ebé agora dadaun ita iha, balun kondisaun que hari’i tiha ona iha fulan kotuk to'o agora seidauk konklui, ida ne'e difikulta tebes”, afirma nia.
Tanba bazeia ba imajen balun ne’ebé viral iha medida sosial, kona-ba izolamentu balun iha Dili laran, katak ekipa saúde sira ladun fó tratamentu ba joven feto ho mane hodi ba tau hamutuk sala izolamentu ida de'it.
"Seráke iha tinan ida resin ne'e ita-boot sira labele kria kedan kondisaun. Labele tau ema ida sentraliza hamutuk feto ho mane hamutuk iha ne'eba, nune'e mós fatin kuarentena, favor ida ita-boot sira haree ho didi’ak”, hatete nia.
Iha fatin hanesan Deputadu PD, António da Conceição husu ba timoroan hothotu atu hapara sira-nia protesta kona-ba situasaun ida agora, maibé hamutuk hodi esforsu oinsá mak bele salva povu no nasaun ida ne'e.
"Ami nafatin apela, nasaun ne'e bolu ita, atu ita tenke tau ita esforsu ne'e hamutuk, ba dahuluk ita salva uluk povu, kontestasaun ne'e ita hein tempu ida mai ne'e”, afirma nia.(*)