Haree ba situasaun kalamidade covid-19 ne’ebé akontese hahú husi tinan 2020-2021, fó impaktu maka’as ba povu, inklui estudante sira.
Tanba ne'e, governu liuhusi MESSK preve ona artigu 15 iha proposta orsamentu rektifikativu 2021, atubele fó subsídiu ba estudante sira hodi selu propinas.
Ministru Ensinu Superior Siénsia no Kultura, Longuinhos dos Santos hatete, planu subsídiu ne’e atu hakman problema ne’ebé estudante universidade sira hasoru iha situasaun emerjensia ne'e.
"Orsamentu rektifikativu 2021, iha artigu 15, iha ne'eba preve katak pagamentu subsidiu ne'e sei direta ba universidade, e depois universidade mak halo pagamentu ba estudante, bazeia ba diploma ministerial ne’ebé regula. Ne'e signifika katak governu bele fasilita sira ho subsídiu hahú husi dolar ida to'o US$150”, hatete nia iha PN, kuarta (28/04).
Ho ida ne'e, estudante ne’ebé mak rejista iha ensinu superior bele hetan livre pagamentu propinas, ba semester dahuluk, iha tinan 2021.
“Se propinas UNTL, trinta (US$30) dólar, ita fó trinta dólar, agora sira ne’ebé mak selu propinas to'o US$250 dólar, e governu liuhusi MESSK iha posibilidade fó to'o iha US$,150 dólar, restu família tau responsabilidade ba ida ne'e”, dehan nia.
Maibé, sei la taka dalan ba estudante ne’ebé mak karik selu ona sira-nia propinas ba semester primeiru, mak subsídiu ne’ebé haruka ba sira-nia instituisaun tenke devolve fali ba estudante.(*)