Ministru Prezidente Konsellu Ministru (MPKM), Fidélis Mangalhães hatete, Konsellu Ministru aprova ho alterasaun projetu Rezolusaun Governu nian ba impozisaun konfinamentu domisiliáriu jerál ba ema sira hotu ne’ebé mak hela ka oras ne’e daudaun iha hela Munisípiu Dili.
“Ne’ebé tenke hela iha sira-nia uma ka iha sira-nia alojamentu temporáriu, tuku 00:00 loron 30 fulan-abril tinan 2021 no tuku 23:59 loron 13 fulan-maiu tinan 2021”, informa Fidélis hafoin konsellu Ministru iha Palásiu Governu, kinta (29/04).
Exesionalmente, ema sira bele sai husi iha sira-nia hela fatin iha Munisípiu Dili, bainhira ba ospitál, protesaun sosiál, aprezenta keixa ka denúnsia iha Ministériu Públiku, Provedoria Direitus Umanus no Justisa, komparese iha dilijénsia judisiál ka polisiál sira iha ne’ebé simu notifikasaun.
Nune’e mós ba sosa ai-han, refeisaun, sasán, kombustivel, selu eletrisidade, telekomunikasaun, asesu ba servisu finanseiru, halo atividade profisionál, maibé tuir regra ne’ebé preve iha rezolusaun governu nia.
“Dezlokasaun hirak ne’e bele hala’o de’it durante tempu ne’ebé presiza tebes atu konkretiza objetivu dezlokasaun ne’e nian, no bainhira akontese tanba razaun serbisu, ema tenke lori dokumentu ne’ebé hatudu sira-nia obrigasaun atu ba no hela iha serbisu fatin”, afirma Fidélis. (*)