PR Lu Olo bainhira presta omenajen ikus ba Saudozu Tuloda ne'ebé ho naran sarani Paulo Alves Sarmento, hato'o ninia sentidu kondolensia ba familia saudozu Tuloda.

Xee Estadu ne'e promete ba familia saudozu Tuloda katak iha loron boot ne'ebé sei tuir mai sei fó rekoñesimentu ba saudozu Tuloda ho medalla.

Iha ninia omenajen ikus, PR Lu Olo hatete, nia marka prezensa nu'udar Prezidente Repúblika no mós nu'udar saudozu nia kompañeru luta.

“Ha'u mai hanesan Prezidente Repúblika, husi sorin seluk mai hanesan kompñeiru da luta Saudozu Tuber Loke Dalan nian hodi presta omenajem ikus liu ba saudozu atu ita hotu hamutuk lori hela nia tau iha nia fatin ikus nian”, dehan Lú Olo iha mate-uma, Lahane, Dili, Kuarta (19/06/2019).

PR Lu Olo dehan, nu'udar kompañeru luta nia mós sente triste hanesan ho buat ne'ebé familia sira se sente.

“Ha'u rasik Lú Olo sente triste hanesan mós familia, oan sira sente," dehan Xefe Estadu ne'e.

“Tuber Loke Dalan nia kapasidade rasik ho nia matenek rasik atu bele halo buat hotu hodi partisipa iha rezisténsia ida ke naruk, susar, no ho folin boot.”

Lu Olo hatutan, husi serbisu ne'ebé Tuloda halo ba povu no nasaun Timor Leste mak Prezidente Republika husik hela estadu ninia rekoñesimentu boot no orgullu ba saudozu.

“Prezidente Repúblika de'it mak iha direitu atu tau nia kompañeru sira iha nia fatin, tanba ne'e dekretu Prezidente Republika sai tiha ona hodi tau saudozu Tuber Loke Dalan iha nia fatin jardim dos herois Metinaro."

Durante Luta ba Libertasaun Nasional Tuloda hala'o serbisu maka'as liu iha frente klandestina hamutuk ho Antonio Tetun AiTahan Matak, Pedro Nunes Sabala'e.

"Ema ida tubir ne'e maka'as tebes. Nia tau Xanana iha ninia bolsu. Nia lori surat mai hau e lori ha'u nia surat ba Xanana mas nia nungka dehan ba ha'u katak Xanana subar iha Lahane no nia hasoru ha'u. Ema ne'e rai segredu no sempre hamnasa kuandu ha'u hakilar no hirus," dehan Aitahan Matak.