Maibé iha Governasaun ne’ebé antes ne’e lidera husi Kay Rala Xanana Gusmão konsege mamar hodi fó apoia no projetu ba kompaña no emprezáriu sira atubele implementa ho kondisaun flexibilidade.

Tanba ne’e, Emprezáriu Timoroan, Rui Castro hatete, durante governasaun ne’ebé lidera husi Kay Rala Xanana fó masin-midár mak barak liu ba emprezáriu sira, maibé iha tempu Primeiru Ministru, Taur Matan Ruak nia ukun, hahú aperta emprezáriu sira.

Bainhira seitór privádu hatoman-an ona ho paun midár, ho bani-been, ho masin midár, bainhira masin midár laiha ne'e, sira sempre hakilar.

"Maun Xanana, nia ukun ne'e, fó masin midar barak, fó bani been barak, entaun, bainhira maun Taur nia ukun, aperta sintu", afirma Rui Castro iha Salaun Joăo Paulo II, iha Komoro, sesta (30/04).

Durante Xanana nia ukun ho bani been, masin midár, seitór privádu sira iha Timor-Leste laran tomak, barak mak hetan benefísiu.

"Maun Taur nian ne'e, fó, mais aperta. Aperta tiha oituan, ema komesa hamlaha tiha ona. Ema hatoman-an tiha ona ho buat ida gampang, entaun ita aperta oituan ne'e, sempre hakilar. Ne'e ema dehan oportunista. Labele", deklara Castro.

Tuir loloos seitór privádu sira ne'ebé hetan ona oportunidade durante tinan 10 nia laran, labele halerik tan, maibé tenke halo ona reinvestimentu ida.

"Maun Xanana, fó masin midár, fó bani been hothotu, maun Taur hanorin ita para atubele hadeer, la'o foti oin iha situasaun difísil", dehan.(*)