Xefe Bankada Fretilin, Francisco Miranda Branco hatete, Serka Sanitária no komfinamentu domisiliáriu jerál ne’ebé governu aplika durante loron 14 ba munisípiu Dili, hamosu kontestasun maka’as husi motorista no taksísta sira.
"Desizaun (Serka Sanitária) ne'e iha nia konsikuénsia, hothotu kumpre, se estadu deside ida ne'e, haree ona nia konsikuénsia, atu responde ba situasaun empreza sira ne’ebé nain ba transporte públiku, nomós ba motorísta sira”, dehan Branco iha PN, sesta (30/04).
Iha reiuniaun Konsellu Ministru, loron 29 fulan-abril tinan 2021, aprova ona rezolusaun hodi impozisaun konfinamentu domisiliáriu jerál ba iha kapitál Dili.
Ho ida ne’e, populasaun tenke hela iha uma ka iha sira-nia alojamentu temporáriu, tuku 00:00 loron 30 fulan-abril tinan 2021 no tuku 23:59 loron 13 fulan-maiu tinan 2021.
Iha rezolusaun ne’e mós bandu atu transporte públiku sira hala’o movimentu iha área sira hotu iha Munisípiu Dili, liuliu, mikrolets, biskota, taksi sira no anguna sira.
Maibé iha loron 30 fulan-abril kuaze tuku 09:00 otl, motorista sira konsentra hamutuk iha palásiu governu oin hodi ezije governu atu labele hapara movimentu transporte públiku. (*)
