Hafoin governu liuhusi Konselu Ministru (KM) aprova hodi aplika tan serka sánitaria no konfinamentu domisiliáriu jerál iha Dili, mak halo kondutór sira la hetan rendimentu tanba pasajeiru menus.
Ho ida ne’e, Kondutór Delfim ximenes, sente triste tebes ho governu nia desizaun ne'e, tanba pasajeiru menus hodi fó impaktu ba sira-nia moris nu'udar povu kiik.
"Karik serka sanitária mak estende nafatin hanesan ne'e, to'o fulan tolu ka ba oin tan, ha’u sente difísil, tanba osan sai mak iha maibé osan tama laiha”, afirma Delfim ba www.tempotimor.com iha nia hela fatin Bidau, domingu, (02/05).
Kondutór ne'e mós husu ba governu atu kria kondisaun ne'ebé dignu hodi sira bele sustenta sira-nia família.
"Husu ba Governu atu kria kondisaun ne'ebé di'ak, atu nune'e ami bele sustenta ami-nia família. Ami traballadór ne'ebé saláriu la'ós permanente, ami servisu mak simu osan, la servisu la simu osan”, dehan nia.
Nune'e mós Francisca Ximenes nu'udar alin husi kondutór ne'e sente triste tebes, tanba durante ne'e nia maun mak sustenta sira-nia moris.
"Hakarak Governu atu kria kondisaun ne'ebé di'ak, atu nune'e bele normaliza fali servisu sira, liliu povu kiik sira hanesan kondutór ka ai-leba sira. Ema (pasajeiru) laiha atu tula, entaun fó impaktu maka'as ba ami-nia moris nu'udar foho oan mai hela iha Dili hodi eskola”, afirma Francisca. (*)