Tempotimor (Dili)-Ministru Asuntu Parlamentar no Komunikasaun Sosiál (MAPKomS), Francisco Martins Jerónimo hatete, Governu prevee ona orsamentu montante millaun US$10 iha orsamentu raktifikativu  atubele sustenta ai-han lokál hodi hamenus importasaun mai Timor Leste (TL).

"Lós duni, ha’u hanoin iha orsamentu raktifikativu ita prevé osan 10 milhões atubele sustenta ai-han lokál, atu nune'e ita labele depedénsia ba ai-han importasaun husi rai liur, tanba ita-nia produtu lokál mós iha”, dehan Francisco Jerónimo iha Plenária Parlamentu Nasional(PN), segunda,(03/05).

Deklarasaun ne'ebé fó sai husi Ministru Francisco ne’e hodi responde preokupasaun deputadu bankada KHUNTO, Antonio Verdial, ne'ebé husu pozisaun Governu oinsá promove produtu lokál hodi evita dependénsia ba importasaun.

Maske Gogvernu aloka ona orsamentu hodi promove produtu lokál iha munispiu sira, maibé la taka dalan atu halo importasaun, bainhira presiza duni.

“Ita prevé osan 10 milões atubele sustenta ai-han lokál, karik la to'o foin bele mai husi rai liur, no ida ne'e ami agradese ba bankada KHUNTO tanba fó hanoin fali ba governu ne'ebé governu rasik halo ona prevensaun ba sira ne'e hotu”, afirma nia.(*)