Tempotimor (Dili)-Deputada Bankada Partidu Libertasaun Popular (PLP), Maria Angelina Sarmento, krítika ba Sentru Integradu Jestaun ba Krize (SIJK), tanba sidadaun ne'ebé trata guia ba munisípiu viola regra prevensaun covid-19 iha Sentru Konvensaun Dili (SKD)-Merkadu Lama.

Tanba, deputada ne'e haree sidadaun sira durante ne’e ba trata dokementu iha SIJK, la uza máskara, la fase liman, no laiha distansiamentu sosiál, maibé autoridade kompetente la foti asaun hasoru.

Ne'e duni husu ba governu presiza fo hanoin ba Sentru Intergradu Jestaun Krize hodi tau regra rigorozu nune'e sidadaun ne’ebé trata dokementu bele kumpre.

“Ikus liu kona-ba governu atu fó prioridade, aplika regra ida ne'ebé rigurozu liu protukolu covid-19, liuliu ba ema sira ne’ebé mak ba hato'o pedidu ba Sentru Intergradu Jestaun Krize (SIJK), tanba ita haree sira-nia disiplina kuaze laiha, hothotu ba bou hamutuk iha ne'eba, laiha tiha distánsia sosial, la uza máskara, e laiha polísia ruma mak mai atu sira bele hamrik ho distansia sosiál”, hatete nia iha plenáriu PN segunda (03/05).

Tuir lolos, seguransa ka pesoál saúde sira iha Sentru Intergradu Jestaun Krize tenke halo aviza, wainhira sidadaun viola regra, tanba, konsidera ne'e nu’udar aglomerasaun pesoál ne’ebé bele fó kauza númeru pozitivu covid-19 aumenta.

“Ho nune'e mak ami husu ba governu fó hanoin ba sentru intergradu atu tau orden, ba ema sira ne’ebé mak ba hamutuk iha sentru intergradu jestaun krize iha CCD ne'eba, atubele impoin regra ba sira”, afirma nia.

Hatan ba kestaun ne'e, Ministru Asuntu Parlamentár no Komunikasaun Sosiál (MAPKOMS), Francisco Martins Jerónimo hatete, ba kestaun ne'e rejista ona, no sei aprezenta ba Ministériu konpetente atubele buka solusaun.(*)