Liuhosi reiuniaun Konsellu Ministrus iha Auditóriu Ministériu Finansas, kuarta (05/05) hodi aprova ona Rezolusaun Governu nian kona-ba ezonerasaun atuál Prezidente Konsellu Administrativu Rádiu no Televizaun Timor-Leste, E. P (RTTL, EP) no ba nomeasaun Prezidente Konsellu Administrasaun RTTL,EP, foun, José António Belo, ba períodu tinan haat. Liuhosi proposta Ministru Asuntus Parlamentares no Komunikasaun Sosiál, Francisco Martins da Costa Pereira Jerónimo.
Maski mandantu ba Prezidente RTTL,ep sesante tuir loloos ba tinan haat, konta husi loron 9 fulan-janeiru tinan 2019 to’o fulan-janeiru tinan 2023, bainhira Konsellu Ministru deside hodi nomea Prezidente foun Francisco da Silva “Gari nu’udar ” Konsellu Administrasaun RTTL.EP, tuir proposta Sekretáriu Estado Komunikasaun Sosial Merício dos Reis Akara.
Maibé iha mandatu tinan rua fulan haat nia laran Ministru Asuntu Parlamentar no Komunikasaun Sosiál (MAPKomS), Francisco Martins Jerónimo, aprezenta proposta hodi nomea hikas fali José Belo hodi akotu mandantu Prezidnete RTTL sesante.
Hafoin desizaun Konsellu Ministru sira, Ministru Francisco Martins Jerónimo hatete nia parte garante José António Belo ba Prezidente foun Konsellu Administrasaun Rádiu noTelevizaun Timor-Leste,Empreza Públika (RTTL,ep) períodu tinan haat sei mellora servisu ho di'ak liután.
“Ha'u garante katak sei servisu ho di'ak liu no kontinua servisu sira ne'ebé iha ona no uza profisionalizmu hodi mellora servisu sira iha RTTL,ep ho di'ak liután”, dehan Francisco Jerónimo, hafoin reuniaun Konsellu Ministru, iha Ministériu Finansa, Aitarak-laran, kuarta (5/05).
Prezidente foun sei kontinua prioridade empreza estatál ne'e no apoiu polítika Estadu iha dezenvolvimentu nasionál.
“Politika Governu no Estadu nian mak dezenvolvimentu nasionál, ne'ebé tenke sai hanesan parte ida mós ba mídia estatál ne'e, hahú hosi infraestrutura no rekursu umanu”, afirma nia.
Maibé agradese mós ba Prezidente RTTL,ep sesante tanba durante ne'e servisu hamutuk ona ho di'ak, maibé sei presiza nafatin atu servisu hamutuk.
“Ha’u hakarak agradese ba Prezidente RTTL,ep sesante, Francisco da Silva 'Gary', tanba durante ne'e servisu hamutuk ho ha'u, maibé ohin Konsellu Ministru deside ona atu troka, ha'u fiar sei presiza nafatin nia (Prezidente sesante) atu servisu hamutuk ho ha’u”, afirma. (*)
