Tanba ne’e, husu atu sidadaun sira respeitu PNTL, tanba iha situasaun difísil nia laran presiza polísia atu assegura.

“Ha'u sei husu ba sidadaun sira, para respeita ita-nia polísia sira, labele tuda sira, labele baku sira tanba ikus-ikus ne'e la'ós de'it tuda polísia trata polísia, tuda mós ita-nia ambulánsia sira, médiku sira, kasian ita kuandu iha susar laran ita presiza sira, kuandu ita di'ak ita duni sira, trata sira labele”, dehan Taur hafoin reuniaun ho Prezidente Repúblika, Francisco Guterres ‘Lú Olo’ iha palásiu prezidensiál, Bairropite, kinta (27/05).

Maske, Timor-Leste nasaun ki'ik no kiak maibé povu ida sivilizadu ne'e hanorin respeitu, tanba importante respeitu ne'e hahú hosi uma laran ho família sira hafoin ba sosiadade.

"Harmonia no paz ne'e mai hosi respeitu ne'e, kuandu respeitu laiha ne'e anarkizu no violénsia buras iha rai laran", dehan Taur.

Maibé husu ba sidadaun hotu kontinua mantein respeitu malu. “ita husu ba sira atu violénsia ne'e labele iha tanba iha dalan barak ita rekore, ita nasaun demokrasia, nasaun ida bazeia ba lei, regra no ha’u espera katak ida ne'e mós sai lisaun ida ba ita, ba tempu oin mai”, afirma nia.

Entetantu, Komandante Jerál Polisia Nasionál Timor-Leste (PNTL), Komisariu Faustino da Costa hatete, bazea ba akontesementu hirak ne'e komandu la'ós nonok, tanba komandu hasai ona ekipa konjunta tantu hosi inspensaun, departamentu justisa atu hasoru vítima sira no membru polísia sira hodi submete ba prosesu.

Ba kazu sira ne'e iha nia prosesu rua, prosesu interna no prosesu externa, hosi prosesu rua ne'e, ida independente, maibé ida fali haree mós ba nia grau infrasaun sira no sei hein parte sira seluk. (*)