Pedidu estensaun Estadu Emerjénsia dala-14 ne'e, Parlamentu Nasionál (PN) iha loron sesta (28/5) deside aprova ona liuhusi votusasaun nominál afavor 35, kontra 0, no absteinsaun 21 mai husi deputadu CNRT hodi hatudu sira-nia neutralidade.
Tanba renovasaun Estadu Emerjénsia ne'e sei aplika durante loron tolu 30, hahú husi loron 2 fulan-juñu no terminal iha loron 1 fulan-jullu tinan 2021.
Hafoin aprovasaun, Prezidente Parlamentu Nasionál (PN), Aniceto Longuinhos Guteres Lopes husu ba Governu atu ezekuta medida hirak ne'e bazeia ba autorizasaun governu.
"Nune'e, lei autorizasaun da renovasaun deklarasaun Estadu emerjénsia, aprova ona, no husu ba governu atu implementa didi’ak no responsabilidade”, dehan nia liuhusi debate Estensaun Estadu Emerjénsia (EE) ba dala-14 iha plenária Parlamentu Nasionál (PN), sesta (28/05).
Rekomenda mós ba governu, atu nafatin esforsu halo sensibilizasun ba ema hotu hodi kolabora iha luta hasoru covid-19.
Maibé deputada CNRT, Verginha Ana Belo husu governu atu halo esplikasaun klaru kona-na razaun estesaun Estadu Emerjénsia.
"Iha estensaun estadu emerjénsia ba dala-14 ne’e, Bankada CNRT ezije esplikasaun klaru husi órgaun estadu sira kona-ba razaun estensaun ba estadu emerjénsia ida ne’e”, deklara nia.
Tanba realidade hatudu estadu emerjénsia, serka sanitaria, no konfinamentu obrigatóriu maibé Governu kontinua permite movimentu husi aero no fronteira.
"Faktu ida ne’e ita bele haree liuhosi kamioneta sira ne’ebé transporta produtu karpintaria nian husi Kupang mai Dili, mezmu Dili iha hela situasaun lockdown ka serka sanitária nia laran”, dehan nia. (*)