Tanba, prezensa Xanana nian iha fatin públiku hodi halibur komunidade sira iha kapitál Dili durante ne’e viola regra distansiamentu sosiál no konfinamentu obrigáriu ne’ebé fó sai husi governu.
Xefe bankada FFRETILIN Francisco Miranda Branco hatete, Pozisaun Fretilin kontinua husu ba bankada sira wainhira halo intervensaun tenke onestu no labele halo deskriminasaun ba sira-nia deklarasaun rasik.
"Merkadu Tasitolu, Ministru Solidariedade, distribuisaun Sesta Bázika maibé ita haluha tiha mós Maslidun iha ne'e de'it mós ita diskrimina ona, hanesan fali Maslidun ne'e iha rai seluk ida, la'ós iha Timor-Leste, Merkadu Tasitolu iha Timor-Leste, distribuisaun Sesta Bázika iha Timor-Leste, maibé Maslidun iha planeta seluk”, deklara Branco iha plenária PN, sesta (28/05).
Maski estadu deside estadu emerjénsia no konfinamentu obrigatóriu iha Dili, maibé lider rejisténsia sira kontinua halo dezinformasaun no dezinfriada hasoru desizaun estadu nian.
“Ha’u koloka pergunta ida ba ita hotu, tanbasá mak konfinamentu obrigatóriu estadu deside maibé sa'e aas, e ohin ita bele simu informasaun horseik nian dadus, 200 ona, loron ida de'it. Ne'e tanbasá, pergunta ida ne'e tanba iha rejisténsia ida hasoru desizaun estadu nian, ida ne'e, mak razaun konkreta loloos”, dehan nia.
Ho ida ne'e, Sentru Intergradu Jestun ba Krize mós aprezenta ona relatóriu ne'ebé sita, líder istóriku sira, presiza koopera desizaun estadu nian oinsá hamenus propagasaun covid-19 iha rai laran.
“Sua exelénsia Prezidente Republika mós sita figura públiku sira ne'ebé hatete hadomi povu, preokupa povu nia moris, saúde, maibé mosu iha públiku la kumpre regra bázika protesaun, saúde públika nian”, hatete nia.
Maibé Primeiru Ministru (PM), Taur Matan Ruak, husu líder no sosiedade atu kaer liman hamutuk hodi rezolve Covid 19 iha rai-laran, tanba pandemia ne’e inimigu nasaun.
"Ha’u konvida lideransa nasionál, partidu polítiku sira, empreza no forza sira ne’ebé hola parte iha ita-nia Sosiedade Sivíl atu kontribui ba esforsu dizeminasaun no sosializasaun informasaun kona-ba benefísiu sira husi vasina, ne’ebé boot liu fali potensial risku hirak ne’ebé iha bainhira ita simu vasina”, dehan PM Taur
Deputadu Branco hasai deklarasaun ne'e hafoin Deputada husi bankada CNRT, Fernanda lay ne'ebe kritika governu kona-ba komunidade sira la kumpri regras prevensaun Covid-19 hanesan distansia sosial iha fatin-fatin, maibe deputada ne'e la temi de'it fatin balun no la mensiona fali Prezidente partidu CNRT ne'ebe halibur komunidade iha Maslidun.
"Hau konkorda OMS hateten katak, Governu rasik mak viola regra, tanba ne'e mak ema la tuir regras iha merkadu tasi-tolu ne'ebé iha dalan, iha Ministériu Solidariedade, iha sentru Integradu Jestaun de Krize, Sesta Bázika la iha distansiamentu Sosial, se mak la kumpri agora e barak sai vítima ema hamlaha ita la haree nia konsekuensi mak ida ne'e", nia kestiona. (*)
