Deklarasaun ne’e, Doutór António Guterres, fó sai iha ninian pájina facebook iha loron 30 fulan-maiu tinan 2021, katak seidauk iha estudu ne’ebé hatudu kona-ba sidadaun simu vasina dala-rua la transmite infeksaun Covid-19.
“Seidauk iha estudo cientifico ida mak dehan katak sidadaun vasinadu mesmo simu ona dose ba dala rua, la transmite infeksaun covid-19 - maski ho probabilidade nebe kiik”, deklara iha ninia pájina, domingu (30/05).
Tanba ne’e, konsidera hanesan desizaun politik ida ne’ebé laiha paredes. “Desizaun politika sem parecer cientifico e mediku sei lori dezastre ba saude públika”.
Ho sirkulasaun livre ne’e labele, maibé rekonenda nafatin tuir protokolu ba prevensaun Covid-19. “Sirkula livre sem rastreios? não. Di’ak liu mak kumpri nafatin protocolo saúde nian. Mesmo vasinadu maibé iha kontaktu ho suspeito covid-19, tenke submete ba teste”.
Antes ne’e, PM Taur Matan Ruak iha Parlamentu Nasional, sesta (28/05) hatete, “Sidadaun ne’ebé mak simu vasina dala-rua kompletu nia free ba fatin ne’ebé de’it sem teste se simu ona vasina naturalmente sei free”.
Tanba ne’e, husu ba funsionariu públika atu simu vasina hodi sai ezemplu ba sidadaun hotu.
“Obrigatoriamente funsionáriu sira tenke simu, se ita rasik la kumpri ita obriga ema seluk atu kumpri ne’e oinsá, ne’e parte prinsipiu ida ne’e mak ami husu ba sira naturalmente sei iha grupu risku ne’ebé sei afeita to’o agora ha’u hanesan PM ha’u seidauk koñesimentu”, dehan nia. (*)