"Konsellu ministrus atribui poder tomak ba Ministru Asuntu Parlamentár no Komunikasaun Sosial, ba negosiasaun akordu ho governu Repúblika Populár Xína ba faze daruak projetu demonstrasaun transmisaun televizaun dijital (digital television terrestrial multimedia broadcasting ‘dtmb’) ihaTimor-Leste", informa Ministru Prezidénsia Konsellu Ministru (MPKM), Fidélis Leite Magalhães hafoin reuniaun KM iha salaun Ministériu Finansas, Aitarak Laran, kuarta (02/06).
Maske nune'e, projetu ne'e rasik hahú ona iha inísiu tinan 2019 no hakarak haluan projetu atu aumenta kobertura nasionál televizaun dijital terreste ho instalasaun ba estasaun emisór televizaun nian.
Durante reuniaun iha KM, aprezenta mós opsaun polítiku lejíslativa sira ne'ebé sai hanesan baze ba projetu kona-ba reforma lisensiamentu atividade ekonómika, husi Ministru Koordenadór Asuntu Ekonómiku (MKAE), Joaquim Amaral.
"Konjuntu propósta ne'ebé aprezenta hakarak atu rezolve lakuna no problema sira ne'ebé eziste iha lisensiamentu atividade ekonómika nian sira hodi hadi’a ambiente negósiu nian, liliu dezenvolvimentu ekonómiku nasional”, nia hakotu. (*)
