Deputadu CNRT Arão Noe de Jesus Amaral esplika, iha trimestre daruak ne'e tuir lolos ezekusaun governu tenke atinje ba %40, maibé la akontese tanba Ministériu Finansa aprezenta ezekusaun foin 22%.

"Iha segundu trimestre mós atu hotu tan ona, agora iha dia 4 juñu, lolos ezekusaun ne'e mínimu tenke iha purvolta de 40%, sira ne'e mak ita foin dehan razoável, mais ho agora ita ba ona tinan klaran, ezekusaun sei 22% ne'e lamentavel teb-tebes”, dehan nia ba www.tempotimor.com iha Parlamentu Nasionál, kinta (04/06).

Bazeia esperiénsia ne'e, ezekusaun OJE iha fulan-janeiru, fevereiru seidauk tanba governu foin tama ba faze preparasaun dokumentu no loke konkursu públiku, maibé iha fulan-abril, maiu no juñu lolos faze implementasaun, no ezekusaun tenke sa'e.

Tanba ne'e, sala governu nian la'ós funsionáriu Públiku nian tanba governu rasuk mak muda sistema, no troka funsionáriu, Diretór Jerál sira maske servisu kleur ona, iha administrasaun públika.

Iha fatin hanesan Deputadu Bankada UDT, Francisco David hatete, dadaun ne’e tama ona fulan-juñu, wainhira ba fulan-setembru ho outubru governu sei aprezenta tan OJE 2022.

Bainhira ezekusaun OJE la konsege atinje 100% ba tinan 2021, siknifika governu laiha kapasidade halo jestaun ba OJE ne’ebé mak PN aprova.

"Fizikamente ita haree katak kuaze laiha buat ida, talvez iha razaun tanba covid-19, iha buat sira ne'e prontu buat hotu la funsiona”, afirma nia.

Entrentantu, Diretór Ezekutivu FONGTIL, Daniel Santos do Carmo hatete, ezekusaun OJE 2021 foin atinje 22% tanba membru governu sira-nia razaun mak barak liu, nune'e difikulta sira-nia dezenpeñu servisu.

Tanba Ezekusaun OJE ne'e iha buat rua, atu atinje ezekusaun ne'e, dalaruma nia pursentu bele sa'e maibé ezekusaun ne'e ba operasional sira, saláriu vensimentu no bens servisu. (*)