“Ohin, sai nu'udar loron importante tebes tanba, iha suku ida ne’e duni ita ofisialmente hahú lansa programa hari uma ba ema kbít laek iha territóriu laran tomak ba tinan 2021,” dehan Ministru Estatál, Miguel Perreira de Carvalho, iha diskursu bainhira halo lansamentu ba fatuk dahuluk uma kbiit laek iha munisípiu Likisa sesta (04/06).
Ministru Estatál konsidera, uma kbi'it laek importante tebes, tanba ne’e, VIII goverrnu konstitusionál iha komitmentu polítika lakoi nia sidadaun sira kontinua hela iha uma ne'ebé la dignu no la seguru.
“Uma mak nesesidade prinsipal no bazikas ba populasaun sira, maibé, ho programa ida ne’e, hatudu VIII Governu iha komitmentu politíka katak, sei la husik nian sidadaun ida hela iha kotuk ho kondisaun hela fatin ne’ebé la dignu no inseguru,” tenik nia.
Polítika VIII governu konstitusionál liuhosi MAE sei halo uma kbi'it laek iha territóriu laran tomak hamutuk 1.254. ne'ebé sei implementa husi Programa Nasionál Dezenvolvimentu Suku (PNDS) liuhosi diresaun jerál dezenvolvimentu rural.
Tuir dadus sensus uma-kain tinan 2015, populasaun Timor-Leste atinji ona miliaun 1.3, husi númeru ne’e, populasaun 42% mak sei moris kiak tebes no 58% populasaun mak sei moris ho kondisaun uma ne’ebé aat, la seguru inklui laiha asesu ba be mós.(*)