Tanba husik Prezidente Partidu CNRT, Kay Raka Xanana Gusmão halibur komunidade hodi kontra regra prevensaun Surtu Covid-19, maibé la hetan samada husi Polísia Nasional Timor-Leste (PNTL).
"Tanba nia (Xanana) fiar-an katak Corona laiha ne'e mak nia la uza máskara ne’e ka, ema nasaun barak mak mate maibé ita Timor ne'e la halo tuir ema nia regra ne'e mak susar, ita mak kontra to'ok polísia sira mai baku kedan ita”, dehan Valente iha Tasitolu, sábadu (05/06).
Haree ba desizaun Governu fó sai katak sidadaun ne'ebé mak la'o iha Dili laran no ba Munisípiu tenke tuir nafatin regra Organizaun Saúde Mundiál (OMS) no Ministériu Saúde atu halo distansiamentu Sosial no uza maskara fase liman maibé komunidade hamutuk ho Prezidente Partidu CNRT kontinua kontra.
Durante fulan rua nia laran Xanana Gusmão hamutuk ho Komunidade Bairo Tasitolu hodi ajuda supa sai bee ne'ebé nakonu iha komunidade nia uma, maibé kontra konfinamentu obrigatoriu, tanba halibur ema barak ni laiha distánsiamentu sosial.
Tuir observasaun jornalista www.tempotimor.com iha terenu nota, komunidade barak mak antusiazmu tebes hodi partisipa serimonia ne'e.
Antes inundasaun ataka komunidade iha Timor laran tomak liliu Munisípiu Díli, Governu aplika ona Serka Sanitária no konfinamentu obrigatóriu maibé iha serimonia enseramentu kultural komunidade barak mak kontra regra husi OMS no Ministériu Saúde, tanba la uza máskara, laiha distansia sosiál no iha membru PNTL ne'ebé mak halo seguransa ba eventu ne'e maibé husi dook de'it. (*)