Tanba eleisaun Prezidensial ne’ebé sei hala’o iha tinan 2022, komisaun A iha ona hanoin hodi halo diskusaun ho parte Ministériu Administradaun Estatal (MAE), Comissão Nacional da Eleições (CNE) inklui mós Sekretariadu Tekniku Administrasaun Eleitoral (STAE).
Prezidente Komisaun A, deputadu, Joaquin dos Santos hatete, sira sei tau prioridade ba lei eleisaun prezidénsia tanba iha norma balun kona-bá resesiementu eleitorál, no orgaun eleitor sira-nia kna’ar.
"Ami tau prioridade primeiru mak eleisaun ba prezidente da repúblika, tanba ne'e tinan oin ita ba eleisaun, atu haree lakunas ruma iha ne'e ita bele hadi'a, depois haree didi'ak norma balun kona-bá resensiamentu eleitorál ho orgaun eleitoral ninia kna’ar ne'e”, dehan nia iha PN, segunda (7/6).
Maibé, ajenda diskusaun lei ne'e, komisaun A fahe ba pakote tolu, pakote dahuluk kona-ba Orgaun Eleitorál ho Resensiementu eletorál, ho Eleisaun Prezidénsia ho Parlamentár.
Iha pakote daruak reforma judisiáriu hanesan organizasaun judisiária, estatutu ministériu públiku, no estatutu majistradu Judisial, rejime jurídika kona-ba hari’i asosiasaun públika profisionál, nomós orgaun médiku no orgaun advogadu.
Rejime ida ne'e parlamentu Nasional aprova ona iha jeneralidade no hein de'it atu komisaun halo kalendáriu ba espesialidade, liliu pakote ne’ebé hola parte iha sistema reforma judisiáriu Aleinde pakote ba datoluk nian, kona-ba administrasaun polítika, hamutuk lei haat, aprova ona balun, kona-bá Atauro atu sai munisípiu inklui eleisaun munisipal, no desentralizasaun poder lokál.
Husi lei hirak ne'e tama iha pakote ne'ebé, atu komisaun prioridade aselera prosesu iha tinan 2021 nia laran.
"Se la hotu, tinan 2022 ita haree tok oinsá mak ba halo hotu tiha lei sira ne'e”, dehan nia.
Nune’e, pakote eleisaun Prezidensial, komisaun sei hahú halo audénsia ho governu, iha loron tersa (08/06) no semana oin sei aprova relatóriu hodi haruka ba meza PN. (*)