Prezidente Parlamentu Nasionál, Aniceto Longuinhos Guterres Lopes, iha loron tersa (08/06) enkontru regular ho Prezidente Repúblika hodi ko'alia kona-ba, prosesu lezislativu parlamentu nian tanba iha lei barak no besik ona ba periodu resesu iha loron 15 fulan-juñu to'o 15 fulan-setembru tinan 2021.
"Prezidente Repúblika husu atu ami bele oinsá rezolve lei sira ne'e, antes tama ba resesu, ne'ebé ami sente dezafiu boot ida agora maibé ami tenke fó uluk ba prioridade ba ida ne'ebé mak tenke uluk”, dehan nia hafoin sorumutu ho PR Lú Olo iha Palásiu Prezidensiál Bairopite, tersa (08/06).
Nune'e Parlamentu Nasionál, sei fó prioridade liuba lei pakote reformas juridisiáriu nomós lei pakote eleitorál tanba eleisaun prezidensiál besik ona e governu tenke iha preparasaun ba eleisaun sira tuir mai.
“Pakote rua ne'e mak ami sei fó propriedade nomós lei kona-ba enkuadramentu orsamentu jestaun finanseira lei ne'ebé importante ne'ebé propriedade husi ne'e to'o 15 fulan-juñu, no atu trata lei barak, klaru que ami la bele halo milagre tanba tempu badak”, haktuir nia. (*)