Tanba polítika prevensaun surtu Covid-19 ho EE no serka sanitária limita sidadaun nia dereitu ba liberdade hodi halo movimentu.
“Ida ne'e lori sakrifísiu tanba limita ita-nia liberdade no direitu ita-nia sidadaun sira, komu limita mós ita-nia movimentu ba atividade ekonómika sira. Ida ne'e lori sakrifísiu barak ba família sira. Hanesan ohin dehan, família sira ne'ebé moris kada fulan ita simu osan, ne'e di'ak oituan. Mais sira ne'ebé moris depende ba haknauk fa'an fila liman, sira-nia vida ne'e mais difísil liu”, hateten PM Taur Matan Ruak, iha Ministériu Finansa (MF) Ai-tarak Laran, tersa (08/06).
Maske estadu halo ona intervensaun balu hodi ajuda hamenus todan, maibé ida ne'e la kompara ho buat ne'ebé afeta ba família sira, tanba apoiu husi governu ki'ik liu.
Haree ba tinan 2020, governu apoiu ona populasaun sira ho osan US$200 dolár kada família, no iha tinan 2021 governu avansa ho programa sesta bázika. Maibé montante husi apoiu hirak ne'e, governu nia komparasaun kiik liu ho tempu ne'ebé sidadaun sira lakon.
“Mais ne'e manifesta tebes ita solidariedade, ita-nia sentimentu domin ba ita-nia populasaun sira, ita apoiu sira. Mais númeru ne'ebé ita lakon kuantidade, ita lakon husi paralizasaun, hapara ita-nia ekonómia, movimentu ema nian, no ekonómia nian, ne'e boot liu”, haktenik nia. (*)