“Governu konvoka reuniaun ho Xefe Suku husi Dili, tanba Dili nu’udár episentru ba propagasaun Covid-19, ne'ebé dalan atu hakotu korrente tranzmisaun ne'e mak liuhusi vasina, tanba ne’e, governu hakarak rekolla informasaun husi Xefe Suku sira kona-ba programa vasina ne’ebé daudaun ne’e la’o hela iha terenu, atubele buka mekanizmu di’ak liután nune’e bele envolve sidadaun barak iha vasina”, dehan PM Taur liuhusi karta komunikadu ne'ebé www.tempotimor.com asesu, tersa (08/06).
Durante reuniaun, Xefe Suku sira hato’o informasaun ne’ebé sira hasoru iha suku laran durante implementasaun faze dahuluk kona-ba vasina.
Xefe Suku sira hato’o mós preukupasaun no sujestaun ba governu aplika vasina obrigatóriu, maibé halo jestaun di’ak ba tempu no fatin, hasa’e númeru pesoál ne’ebé fó vasina.
Tanba komunidade barak mak hakarak atu simu vasina, maibé númeru pesoál, vasina no livru kinur mak la sufisiente.
Ho ida ne’e, Governu agradese ba sakrifísiu Xefe Suku sira-nian iha baze, tanba durante halo servisu hodi sensibiliza no mobiliza komunidade ba simu vasina.
“Governu rekoñese na'i Xefe Suku sira-nia sakrifísiu no husu fó nafatin kontribuisaun, para mais ita-nia sidadaun vasina barak liután, mais loke ba normalidade foun, para atividade ekonómia no sosiál bele la'o filafali”, dehan nia.
Kona-ba prekupasaun husi xefe suku sira, governu sei diskute kle’an liután ho Ministériu Saúde, no ekipa Sala Situasaun atubele hetan mekanizmu di’ak iha programa vasinasaun, nune’e bele atinje meta ne’ebé Governu define ona.
“Bainhira númeru vasina atinje ona meta, Governu iha posibilidade normaliza fali vida ekonómia no sosiál, hamamar regara sira ne’ebé durante ne’e impoin, atu komunidade sira bele sírkula livre halo atividade sósiu-ekonómiku”, deklara nia. (*)