Vise Ministra Solidariedade Sosiál, Signi Chandrawati Verdial hatete, normalmente governu halo ona proposta-alterasaun ba lei pensaun vitalisia no entrega ona, maibé desizaun ne'e PN mak sei foti.
“Governu iha boa vontade atu submete buat ne’ebé mak ita-nia komunidade no ita-nia populasaun rekere. Entaun ami-nia proposta halo ona kabe kompeténsia Parlamentu Nasionál hodi haree”, dehan nia iha PN, kuarta (9/6).
Tanba luta ba alterasaun lei pensaun vitalísia ne'e populasaun rasik mak ejize, parte MSSI defende hodi halo proposta ba parlamentu nasionál atubele hodi diskute.
“Difísil ka la disífil ne’e kompeténsia iha Parlamentu Nasionál nian tanba parlamentu mak halo lei. Ami-nia proposta hosi Governu, ami submete ona tuir buat ne’ebé mak ita promete ba povu”, dehan nia. (*)