“Sidadaun ne'ebé mak tama ona idade 16 anos ba leten bele hakat ona ba fatin resensiamentu sira atu resenseamentu nomós sira ne'ebé pretende atu halo atualizasaun ba kartaun Eleitorál, ezemplu atu muda fatin votasaun nian, baibain vota iha Baukau kuandu eleisaun tuir mai sira vota iha fatin seluk altera fatin Kartaun Eleitorál atu to'o tempu permite sira mós bele vota”, deklara Miguel Pereira de Carvalho iha Ministériu Finansas, kuarta (09/06).
Tanba iha loron 1 fulan-jullu sei halo resenseamentu Eleitorál no atualizasaun baze dadus durante fulan neen to'o fulan-janeiru tinan 2022.
Nune'e Governu fó kriteria ba votante ne'ebé mak Eleitorál husi Munisípiu nian bele vota iha fatin tanba preokupa ho atividade servisu nia maibé antes loron 50 bele aproxima ona ekipa Sekretariadu Tékniku Administrasaun Eleitorál (STAE) hodi atende.
“Proposta lei Eleisaun Prezidensiál ne'ebé mak Governu propoin ba Parlamentu Nasionál (PN) atu estabele sentru Votasaun Paralelu Governu hanoin atu halo iha Dili, atu permite ema ne'ebé mak la fila ba Munisípiu iha loron eleisaun bele vota iha Dili maibé iha kritéria, antes to'o loron 50 tenke informa ona ba STAE”, dehan nia.
Antes ne'e Governu liuhusi MAE haruka ona lei tolu ba Parlamentu mak hanesan Lei Orgaun Administrasaun Eleitorál, Lei resenseamentu Eleitorál nomós lei Eleisaun Presidensiál. (*)