Ba prosesu ne'e kleur antes Governu daualu enkontru ko'alia asuntu hodi investe tempu, rekursu no laiha hanoin atu hakotu programa refere.
“Tanba ne'e mak tuir ha'u-nia hanoin se laiha razaun atu hapara, ita mantein prosesu ida ne'e, tanba ne'e diskute kleur ona”, dehan PM Taur hafoin sorumutu ho Prezidente Repúblika, Francisco Guterres ‘Lú Olo’, iha palásiu prezidensiál Bairopite, kinta (10/06).
Tinan barak ona investe, tanba ne'e mak la fasil atu deside hodi kansela programa ne’ebé la’o ona durante ne’e hodi hein implementasaun.
“Normalmente partisipasaun sira hanesan nene mais prosesasaun internasionál, halo ema koñese ita-nia rain, Timor ne'e hela iha ne'ebé, Timor ne'e oinsá, ne'e hanesan mós ita-nia família ita koñese malu, ita namora ho ema nia oan, ita buka hatene ema nia inan aman, hela iha ne'ebé, sira halo saida, lisan husi ne'ebé, ida ne'e mós hanesan ne'e”, haktuir Xefe Governu.
Timor-Leste hakarak aprezenta-an ba nasaun sira iha média oriente atu ema koñese, Timor iha família CPLP koñese, se iha fatin balun la koñese, tanba ne’e lori produtu Timor-Leste ba halo promosaun.
“Ha'u lembra. Ha'u sei jenerál, uluk ne'e ita lori kartaun travel dokument, ha'u ba Singapura ne'e ema la koñese, Timor hela iha ne'ebé, buka fali iha kapa Timor hela iha ne'ebé, iha rai barak sira la hatene Timor ne'e iha ne'ebé”, dehan nia.
Dala ruma sidadaun sira viajen ba Euruapa iha ema husu Timor iha ne'ebé, tanba ema la hatene rai ida kiik hanesan ne'e, maibé ko'alia kona-ba Amérika ema hotu hatene, tanba iha mundu ne'e koñesidu, Timor ki'ikno ema la koñese.
“Entaun momentu sira hanesan ne'e ita partisipa ne'e, ema koñese ita-nia bandeira, sira husu ema ne'e mai husi ne'ebé, rai ne'e oinsá populasaun hira, nia ekonomia ne'e halo nusa, Bandeira ne'e, sa tinan mak ukun-an no istória halo halo nusa”, esplika nia.
Maibé, Diretór Asosiasaun HAK, Sisto dos Santos hatete, sira la hatan saida mak Primeiru Ministru dehan laiha razaun atu hapara Expo Dubai , maibé razaun sira ne’ebé atu uza mós la relevante ho kondisaun real agora.
“La relevante tanba imajina iha kapitál Dili de'it, fatin turístika ne'e bee-moos laiha, konstrusaun turizmu sira ne'e laiha, ita-nia produtu sira ne'e mós namuk la folin”, dehan nia
Tanba Parlamentu Nasionál iha Komisaun Ekonomia nia fiskaliza to'o ne'ebé no Asosiasaun HAK nia hanoin laiha razaun ida atu trava, razaun sira ne'e razuavel no rasasinu.
“Expo Dubai ne'e nesesidade ba ema governante nian ka ba povu nian, ne'ebé ami hanoin katak ne'e la relevansia situasaun ida ema halerik ba hamlaha, produtu la folin, ema nia oan sira mós la eskola, bee-moos laiha, ai-moruk mós la natoon ba ema, problema oioin no agora ita fali fakar osan ba Dubai ne'e”, haktuir nia. (*)