Kazu ne’ebé akontese iha aldeia Ainitas Hun, Suku Lahane, Postu Vera Cruz, membru PNTL tiru mate Filomeno de Deus no Camilio de Deus hakanek Januario Pereira, sabadu (05/06) ne’e husik la’o tuir prosesu legal.
“Prezidente Repúblika dehan prosesu hotu la'o no buat hothotu la'o tuir lei ne'ebé iha, nune'e PNTL aproveta oportunidade ida ne'e hodi kontinua hala'o servisu”, dehan Komandante Jerál PNTL, Faustino da Costa hafoin reuniaun ho Prezidente Repúblika iha palásiu prezidensiál Bairu Pité, kinta (10/06).
Tanba iha situasaun Estadu Emerjénsia nian, saida mak PNTL halo no aprezenta kazu ida ne'ebé sai preokupasaun públiku hanesan iha Lahane nian.
Kona-ba kazu sunu uma iha suku Lahane, Postu Vera Cruz, Munisípiu Dili prosesu investigasaun iha komandu munisípiu Dili.
Iha ne’e aprezenta mós situasaun seguransa iha teritóriu tomak durante semana ida nia laran la’o hakmatek.
“Ha'u atu dehan de'it ohin kinta (10/06) enkontru semanál PNTL ho Prezidente Repúblika, Francisco Guterres 'Lú Olo', normalmente aprezenta ita-nia situasaun rai laran, aprezenta situasaun la'o ho di'ak ho kalma”, dehan nia. (*)