Ministra Negósiu Estranjeiru no Kooperasaun (MNEK), Adaljiza Magno, iha palásiu prezidensiál, Bairopite, sesta (11/06) hatete, nia parte akompaña xefe estadu hodi simu karta kredensiál.
“Ohin ha'u mai akompaña Prezidente Repúblika atu simu kredensiál embaixadór, Boibat Malainin Boibuat (Abba), husi Repúblik Árabe Saharaui ne'ebé mak nia troka presor ne'ebé ba ona”. Dehan Adaljiza ohin.
Tanba Embaixadór Brahim Ghali iha Timor-Leste kuaze tinan 10 resin ne'ebé ba fila ona, no embaixadór foun mai hodi kontinua servisu kooperasaun nasaun rua ne’e.
“Prezidente fó korajen ba embaixadór tanba ita hotu hatene katak, povu Saharaui luta hela ba autodeterminasaun ne'ebé mak sira-nia istória kuaze hanesan ho Timor nian desde 75, nune'e to'o agora sira domina de'it pursentu 20 iha sira-nia territóriu”, afirma nia.
Emtretantu Ministra haktuir, sira-nia (Árabe Saharaui) rai ne'e iha hela okupasaun istória kuaze hanesan timor nian iha Timor-Leste mandatu konstitusionál tenke apoiu no fó Solidaridade ba rai ne'ebé luta autodeterminasaun, tenke suporta, tanba sira-nia país ne'e kuaze hanesan ho nasaun Timor-Leste ne'ebé mak uluk teritorialmente la eziste.
“Ita laiha kooperasaun mais, ita ajuda sira loke sira-nia embaixada iha ne'e, ita ajuda sira iha Nasaun Unidas atu luta no ko'alia nafatin sira-nia kauza, ita kompaña nafatin atu sira halo lalais konfrendu atu determina sira-nia futuru”, dehan Ministra. (*)