"Ami ko'alia kona-ba simeira CPLP, ha'u mai husu Prezidente Repúblika se iha desizaun atu ba simeira kalae?. Mais Como ita haree mós situasaun iha rai laran Prezidente deside nia sei la ba", dehan Ministra Negósiu Estranjeiru no Kooperasaun (MNEK), Adaljiza Magno hafoin sorumutu ho Prezidente Repúblika iha palásiu prezidensiál Bairopite, sesta (11/06).
Nune'e, iha kauza ida ne'e Ministra Adaljiza rasik mak sei ba, no hetan akompaña husi enviadu espesial estadu nian.
"Simeira CPLP topik ne'ebé mak Angola atu foti mak kooperasaun ekonómika, ne'ebé mak haree liu depois de pandamia, ita atu foku ba ekonomia diplomasia ne'ebé mak MNEK rasik mós fó atensaun barak, oinsá atu ita iha tan kooperasaun iha ekonomia”, hatete nia.
Iha simeira ne’e mós sei aprova mobilidade, mobilidade hanesan livre tranzitu ba Pais CPLP sira, ezemplu hanesan estudante sira, profesór sira no médiku sira bele ba mai servisu iha nasaun membru CPLP nian.
Iha parte seluk Ministra mós aprezenta kona-ba embaixada sanulu-resin-tolu, ne’ebé Prezidente Repúblika aprova ona, hein halo pedidu agrimon ba pais sira seluk ne'ebé emibaixadór sira atu ba.
"Kuandu países sira aseita ona, Prezidente sei fó poder ba sira”, hatutan nia.
Nasaun sira ne’ebé iha hanesan Malázia, Vietname, Brunei, Mianmar, Nova Zelándia, Bruxelas, Zeneva, Nova Iorke, Jakarta, Maputu, Angola, Áfrika Súl, Korea Súl no Tailándia. (*)