Tempotimor (Dili)-Primeiru Ministru (PM), Taur Matan Ruak, hamaus komunidade iha Postu administrativu Ataúro, atu simu vasina no ignora Informasaun sira ne’ebé espalla iha mídia sosiál fecebook.
"Iha tempu badak ha'u hatene Ataúro sei komesa programa vasinasaun. Entaun, ha'u husu ba ita-boot sira partisipa. Ita-boot sira labele rona fali ema ko’alia iha facebook, iha fatfatin, dehan moras laiha, vasina la di'ak, lalika fiar ida ne'e", deklara PM Taur iha inaugurasaun postu seguransa UPM, Akrema-Ataúro, sesta (11/06).
Tanba ne’e, husu ba populasaun sira iha Ataúro atu fó fiar de'it ba autoridade médiku sira, koopera ho sira, tanba nasaun tomak ninia esforsu primeiru, mak salva ema nia vida atu ema labele mate.
"Karik mate, destinu, mais labele mate tanba ita baruk, lakohi atu tau matan. Entaun, salva vida, salva ita-nia ekonómia, normaliza ita-nia moris, ne'e importante loos. Ita kontente tanba dadaun ne'e, iha Dili, númeru komesa tun maka’as. Mais ita seidauk manán, nia (virus covid-19) sei iha, moras ne'e sei la'o hela”, hatete nia.
Entretantu, progresu kazu infetadu Covid19 iha Timor-Leste atu atinje rihun-8, ema mate besik na"in-19 ona, tanba ne'e governu buka esforsu atu nune'e moras imvizível Covid-19 labele atrapalla dezenvolvimentu ekonómiku.
"Entaun, dalan para ida ne'e bele akontese para impede ida ne'e, primeiru mak vasina”, afirma nia. (*)