“Bainhira ami asume kargo hanesan Ministru, ami koko halo komunikasaun ho parte Europa atubele hetan kanal ne’e, maibé infelismente kanal ne'e rasik iha Timor-Leste ita-nia empreza ida mak manán ona tender ne'e, mak ETO nune'e ETO mak direitu tomak no fornese liña ne'e ba komunidade”, informa Ministru Francisco iha plenária PN, segunda (17/06).

Tanba ne’e RTTL.ep laiha direitu no Governu laiha direitu atu foti tan, tanba konkursu la'o hotu ona no sira manán tiha ona no jogu kopa Europa mós komesa ona iha loron 12 fulan-juñu.

Durante ne'e Governu halo hela komunikasaun atubele fasilita komúnidade hodi asesu ba Kopa Europa ne'e, maibé negosiasaun ho ETO mós la hetan solusaun.

Maibé ba futuru sei tenta nafatin, nune'e RTTL.ep bele sai nain, liliu atu fahe kanal desportu ba komunidade sira.

Ministru deklara sai kestaun ne’e hodi responde ejizénsia deputada, Isabel Ximenes ne'ebé husu ba governu atu fó sai jogu desportu (Kopa Europa) iha RTTL.ep atu nune'e Komúnidade sira nafatin kumpri regra Ministériu Saúde.

“Maske ita iha konfinamentu obrigatáriu, maibé sidadaun barak mak la'o ba buka vizinu sira nia televizaun (TV) atu nonton tanba Kopa Europa ne'e so fó sai de'it iha TV K-vision no ETO, sé governu hanoin hetan ema sira ne'e, hanoin took ba hodi sosa lisensa no fó sai jogu hirak ne'e iha RTTL tanba lisensa sira ne'e la'ós karun liu do que komunidade halibur malu nafatin”, dehan Isabel Ximenes iha plenária PN. (*)